КРЕСТЬЯНА СӦВЕЩАННЬӦ ВЫЛЫН

Мӧскуа. Мӧскуа губерня улысь чукӧртчӧм крестьяна делегатъяс сӧвещанньӧ вылын январ 24 лунӧ Мӧскуаса сӧветын вӧчис доклад Любимов. Висьталіс сиктъясын, вӧлӧсьтъясын, районъясын да уездъясын сӧветскӧй удж нуӧдӧм йылысь да сӧвет учрежденньӧясӧс ёнмӧдӧм йылысь. Шуис, колӧ пӧ сиктса крестьяналы аслыныс босьтчывны бурмӧдны матігӧгӧрса сӧвет учрежденньӧясын удж. Тадзӧн крестьянаяс ёна отсаласны губерняса да мукӧд гырысь учрежденньӧяслы.

Сиктса крестьяна овмӧс йылысь да видз-му уджалӧм йылысь висьталіс Мелецкӧй. Шуис, Мӧскуа губерняын пӧ ӧні кӧдзаяс войнаясӧдз дорысь нин уна (125%), вӧв лыд 1916 восянь соді 28 быд сё вӧв вылӧ (28%), мӧс да ӧш 63%, посни скӧт (ыж, порсь) 1916 восянь соді нин кык мында.

Видз-му колян во крестьяна кост лӧсьӧдлӧма 250 сюрс десятина.

Мелецкӧй бӧрын висьталіс Калинин. Калинин шуис: Мӧскуа губерняын пӧ таво крестьяналӧн вотъяс абу гырысьӧсь, сӧмын лӧсьӧдлыны колӧ сідзи, мед эськӧ дӧваясӧс, сирӧтаясӧс да мукӧд вермытӧм йӧзӧс вӧлі мездӧма дзикӧдз вот мынтӧмысь ли, вотъяссӧ чинтавны ли. На пыдди вотъяс колӧ содтавны вермысьджык крестьяна вылӧ, кодъяс видз-му уджалӧмысь ӧтдор нажӧвитӧны мукӧд ногӧн.

Асланыс резолюцияын крестьяна делегатъяс шуисны: «Сӧвещанньӧ тшӧктӧ Губисполкомлы ӧдйӧджык нуӧдны волисполкомъяс да сельсӧветъяс ёнмӧдан удж правительство тшӧктӧм серти».