АНГЛИЧАНА ПОМӦНЫ НИЛ Ю

Видзӧдлы Египет да Судан мусерпас (карта) вылӧ. Кыкнан йӧзыс олӧны Нил ю бердын. Нил — медыджыд ю Африкаын. Визувтӧ уна сюрс верст зэв жар местаясті. Ю бердас быдторйыс быдмӧ бура. Мунан кӧ бокӧджык юсьыс — немтор абу лыа кындзи. Сы понда став йӧзыс олӧны сӧмын ю бердын. Гырысь жаръясыс понда пӧшти быд гожӧмын Нил косьмывлӧ. Нил юын кӧ ва косьмас али помасны да васӧ канаваяс кузя нуӧдасны бокӧ, улынджык олысь йӧзлы ваыс оз судзсьы. Сы понда вермас бырны турун, вӧр да став му вылын быдмантор. Лӧсьыд оланінъяс пыдди кольӧ сӧмын лыа.

Англичана помӧны Нил ю Суданын. Тадзӧн Египетын олысь йӧзлӧн ва вермас бырны.

Важӧнсӧ Англия да Египет государствояс костын вӧлӧма договор. Договорын урчитлӧмаӧсь, уна-ӧ позьӧ помӧмӧн кутны ва. Ӧні тайӧ договорсӧ англияса комиссар Ли Стэкӧс Египетын виӧм понда англичана орӧдӧмаӧсь да асланыс лёкныс понда кӧсйӧны косьтыны унджык Египетсӧ. Со кутшӧм чорыд сьӧлӧмаӧсь ён государствоса капиталистъясыд. Налы абу жаль челядь ни, вермытӧм йӧз ни.

Тайӧ картина петкӧдлӧ Сеннар кардорса пруд (Суданын). Прудсяньыс ва пондас мунны бокӧ да кӧтӧдны англияса капиталистъяслысь му. Найӧ сэні вӧдитӧны зэв уна хлопок. Пруд кӧсйӧны эштӧдны таво юль тӧлысьын. Со кыдзи англияса капиталистъяс йӧз синваӧн да вирӧн кӧсйӧны тыртны ассьыныс зепнысӧ.