ЯПОНИЯКӦД ВӦЧӦМ ДОГОВОР НАЛЫ ДАЙ МИЯНЛЫ БУР

Медся ыджыд выль юӧр колян вежонын воис СССР-а-Японияа кост лӧсьӧдчӧм йылысь. Гражданскӧй война дырйи дай война помасьӧм бӧрас Япония правительство пыр видзӧдіс мырддьыны СССР-лысь му. Уджалысь йӧзыс татшӧм уджысь правительствоӧс дивитліс.

Ӧні, мыйӧн кывсис японияса уджалысь йӧзлы тайӧ лӧсьӧдчӧм йылысь, налы зэв нимкодь лои, шуӧны: тайӧ лӧсьӧдчӧм лунсянь пӧ позяс лыддьыны во лыд СССР да Япония кост бурӧн олӧмӧ кутчысьӧмлы дай став му пасьта государствояс кост олӧм вежсьӧмлы.

Ми гӧгӧрвоам, мыйла Японияын олысь йӧз радлӧны. Япониялы миянлы дорысь ёнджыка вӧлі колӧ лӧсьӧдчынысӧ. Ӧнія лӧсьӧдчӧм отсалас налы лишалантор вузавны миянлы, ньӧбны миянлысь налы колантор. Сыысь ӧтдор разьӧ налысь кинысӧ тӧргуйтны Тихӧй Океанса діяс вылын олысь йӧзкӧд. Япониялӧн ыджыд государство пыдди олӧм зэв ёна СССР сайын. Бура лӧсьӧдчӧмӧн кӧ водзӧ пондас миянкӧд овны — сэки смелджыка вермас сёрнитны мукӧд сы вылӧ лӧгалысь государствояскӧд. Пансяс кӧ кодкӧдкӧ мукӧд государствояскӧд война, став Японияса рытыввыв берегын олысь йӧзлы нинӧм повны, сайӧдӧ найӧс СССР. Азияса государствояскӧд Япониялӧн тӧргуйтӧм сідзи жӧ зэв уна СССР сайын. Бура кӧ миянкӧд олас — бура и тӧргуйтас.

Тайӧ лӧсьӧдчӧм ёнмӧдӧ — ӧтарсянь Японияӧс, мӧдарсянь СССР-ӧс.