МУ-ВИДЗ ЛӦСЬӦДӦМ ЙЫЛЫСЬ

Коми крестьяна ставныс нин ӧні казялісны став омӧльлунсӧ да сьӧкыд уджсӧ му-видз важ ногӧн уджалӧмын, сы вӧсна асланыс омӧль овмӧссӧ. Найӧ быд ногыс зільӧны му-видз уджалӧм бурджыка сувтӧдны. Ӧткымын крестьяна заводитчӧны выль ногӧн, уна пӧлӧс кӧдзаӧн ассьыныс ӧткымын му вӧдитны. Дерт, татшӧм крестьянаыс став Коми му пасьтала кӧ босьтны, этша на. Унджыкыс крестьяна уджалӧны му-видз важ ногӧн. Мыйла? Крестьяна оз тӧдны, кыдзи бурджык ногӧн му-видз уджавны, да сы вӧсна оз лысьтны важ нога уджалӧмсьыс вештысьны. Сэсся тані медыджыд вӧснаыс (причинаыс) му-видз лӧсьӧдтӧмын.

Му-видзьясным миян важ ногӧн на зэв посньыдӧсь, вывті уна пельынӧсь, мӧда-мӧдсьыныс ёна ылынӧсь. Сикта-сикт костъясын му-видзлӧн абу на прамӧй ногӧн лӧсьӧдӧма межаяс (границы). Сэсся му-видз кыдзи эськӧ колӧ вӧлі абу юклӧма кӧзяйствояс костын. Тайӧ уджсӧ ставсӧ колӧ вӧчны. Колӧ нуӧдны му-видз лӧсьӧдӧм удж, роч ногӧн кӧ шуны — нуӧдны землеустройство.

Ми тӧдам нин важӧнкодь му-видз лӧсьӧдӧм уджыслысь ёна коланлунсӧ. Тӧдам нин, сӧмын му-видз лӧсьӧдӧм удж нуӧдӧм бӧрын позяс паськыда заводитны му-видз вӧдитны уна кӧдзаӧн, уджавны машинаясӧн, с. в. Сӧмын ӧнӧдз эгӧ на чорыда босьтчылӧй тайӧ удж бердас.

Ӧнісянь колӧ босьтчыны чорыда тайӧ удж вылӧ. Колӧ кыпӧдны крестьянаӧс тайӧ уджсӧ нуӧдӧм вылӧ, кӧні найӧ абу на асьныс вӧрзьӧмаӧсь. Колӧ висьтавлыны крестьяналы, код ногӧн босьтчыны тайӧ уджас, кыдзи судзӧдны та вылӧ государствоӧн сетӧм сьӧм. Колӧ быд ногӧн отсавны му-видз йылысь удж нуӧдан юкӧдъяслы (земельным органам) тайӧ уджсӧ нуӧдӧмын.

Ми корам гижны газетӧ му-видз лӧсьӧдӧм удж йылысь агрономъясӧс, корам крестьянаӧс тшӧтш гижны, кыдзи найӧ мӧвпалӧны тайӧ удж йылысь.