КОМСОМОЛ РӦШТВО

Неважӧн муніс кык сикаса праздник: ен рӧштво да комсомол рӧштво. Енлы чужан лун енлы эскысьяс празднуйтісны звӧнӧн, сьылӧмӧн, славитӧмӧн, самӧкурӧн, швачӧн-матьӧн. Уна пӧлӧс лёкӧн на праздничайтӧны енлысь чужӧм — ставсӧ тані он гиж. Босьтам мӧд сикаса «рӧштво». Став му пасьта, попъяскӧд ӧти кадӧ комсомол быдлаын вӧчалӧ комсомол рӧштво. Миян обласьтын татшӧм праздникыс уналаын жӧ вӧлі.

Ен рӧштво — йӧзӧс пемдӧдӧ, дзугӧ веськыд туйсьыс; комсомол рӧштво — восьтӧ синъяс пемыд йӧзлысь, веськыда висьталӧ попъяслысь ылӧдчӧмнысӧ.

Со кыдзи мунӧма миян Коми муын комсомол рӧштво.

ГРИВАЫН. (Сыс. у.) Вӧлі спектак. Видзӧдны локтӧма театр тыр йӧз. Ворсісны «Гора омра». Спектак бӧрын югдытӧдз сьылісны-йӧктісны. Йӧзыслы тайӧ рытыс зэв воӧма сьӧлӧм вылӧ. Рӧштво луннас том йӧз чукӧртчисны лыддьысян керкаӧ. Енлы эскысь йӧз лунтыр дай войбыд таръялісны, комсомолечьяс пионеръяскӧд гажӧдчисны да лыддьысисны бура асьнысӧ видзӧмӧн.

СЛӦБӦДАЫН. (Сыс. у.) Рӧштвокӧд паныд вӧлі спектак. Сувтӧдісны «Обман». Сёрнитісны ен чужӧм йылысь да религияӧн пемыд йӧзӧс личкӧм йылысь. Видзӧдысь вӧлі этша. Кыз йӧзыс на Слӧбӧдаын абутӧм енмӧ эскӧ.

КӦРТКЕРӦСЫН (Кулӧм. у.). Комсомол рӧштво вӧчлісны нардомын. Видзӧдысь вӧліс 88 морт. Вӧлі спектак. Пуктісны роч пьеса «Как дьякон попал впросак». Сюсьджык войтыр висьтавлісны религия йылысь да попъяс йылысь. Нардом ӧдзӧс дорын вӧлі ӧшлӧма пӧнаръяс. Рӧштво рытнас бара спектак.

ЛЫАТЫЫН (От вол. Емд. у.). Школа тыр чукӧрмыліс йӧз. Войбыд сёрнитім, тӧдмалім ен йылысь, попъяс ылӧдлӧм йылысь. Волісны весиг олӧма, енмӧс тӧдысьяс йӧз.

НЮВЧИМ ЗАВОДЫН. Йӧз воліс зэв уна. Сёрнитісны рӧштво йылысь, енлы эскӧм йылысь, поп-дяк йылысь. Сувтӧдісны пьеска «На страшном суде». Спектак бӧрын — гажӧдчисны куим час асылӧдз. Ӧти олӧма морт спектак вылысь мунігӧн шуӧ: «Правильно, товарищ, раз земным царям наклали, то и небесным накладут».

Тадзи лунысь-лун йӧз мездысьӧ религияысь, енмысь, попъясысь. Тадзи воысь воӧ содӧ ен тӧдтӧм йӧз.

П.