КЫДЗИ ВЛАДИМИР ИЛЬИЧ КРЕСТЬЯНА ЮӦРЪЯС ВЫЛӦ ВИДЗӦДЛЫВЛІС

(«Беднота» газет редакторлӧн висьтавлӧм)

Ильичлӧн вӧлі зэв уна гырысь государственнӧй удж. Сійӧ уджыс уна босьтӧ вӧлі вын. Весиг сэки Ильич пыр корсьліс кад сёрнитыштны крестьянинкӧд, деревняын удж нуӧдыськӧд, крестьяна газет редакторкӧд. Ленинлы вӧліны зэв донаӧсь крестьяналӧн юӧръяс.

— Ме ӧд тайӧс ог кывлы некутшӧм докладысь, — шуас вӧлі Владимир Ильич ме ордысь крестьяналысь юӧръяс видлалігӧн. Сэсся помала дугдывтӧг юасяс да дыр кывзас менсьым висьтавлӧм деревня йылысь, мыйӧн деревня олӧ, кутшӧм нелючки уджъяс сэні.

— Но, мый нин петкӧдлӧ миян «крестьяна барометр»?^Барометр — поводдя мурталантор./^ — Тайӧ кывъясӧн вӧлі заводитчас миян сёрни. «Крестьяна барометрӧн» Владимир Ильич шулывліс «Беднота» газет.

Ме зэв бура помнита ӧти сёрни тӧлын 1920−21 воын. Сэки медсьӧкыд кадыс вӧвлі. Дыр война кыссьӧмла став уджалысь йӧзлы сьӧкыд олӧм воліс. Крестьянаяслӧн овмӧсныс пӧшти дзикӧдз киссис. Найӧ кутісны шуасьны, дӧзмыны. Весиг медводзмӧстчысь крестьянаяс омӧля видзӧдны кутісны олӧм вылӧ. Крестьяна кутісны тыртны и «Беднота» газет юӧръясӧн: норасьӧны омӧль олӧм вылӧ, видчӧны. Редакция газетӧ печатайтіс ӧти медъёна Сӧвет власьт вылӧ воӧм юӧр. Воссис газетын ыджыд вензьӧм. Ме муні сёрнитыштны Владимир Ильич дінӧ.

Миян сёрни зэв дыр нюжалі. Владимир Ильич дзик быдтор ёна юасьӧ. Быд юӧр лыддьӧм бӧрын юалас:

— Коді нӧ гижӧ — кулак, шӧркоддьӧма олысь али гӧль крестьянин?

— Со гижӧны, — шуа ме, — Сӧвет власьт пӧ омӧльджык сардырся власьтысь.

— Омӧльджык сардырся дорысь? — юалас Ильич. Читкыртӧм синъясыс аслас сералӧ.

— А коді нӧ, кутшӧм морт гижӧ?

Сёрнитӧм бӧрын Ильич корис менсьым доклад крестьяна юӧръяс йылысь, 60 юӧрысь унджык продразвёрстка йылысь да крестьяна олӧм йылысь ме казьтышті докладын. 8-ӧд став Россияса Сӧветъяс съезд вылын Владимир Ильичӧн висьталігӧн тӧдчӧ вӧлі, кыдзи сійӧ быд боксянь видлалӧма докладсӧ.

Сэтісянь Владимир Ильич пыр менсьым кык тӧлысь пиын ӧтчыд корлывліс «Беднота» газетӧ крестьянасянь воӧм юӧръяс йылысь докладъяс.