СО КУТШӦМ МОРТ ВӦЛІ ЛЕНИН АС ВӦСНАЫС ТӦЖДЫСЬӦМЫН

Ильичлӧн сюсь синъясыс вӧлі быдтор аддзӧны. Мыйӧн казялас вӧлі, кодкӧ ёртъяс пиысь уджалӧмысла ёна нин мудзӧма, пыр и шуны кутас вӧлі, да лӧсьӧдасны сійӧ шуӧм серти постановленньӧ: лэдзны мудзӧм ёртӧс тӧлысь кежлӧ шойччыны.

Ленин ёртлӧн мукӧд вӧсна тӧждысьӧмыс вӧлі быд посниторйын. Ӧтчыд сійӧ казяліс — Бухарин ёрт ветлӧ киссьӧм кӧмкотӧн. Сійӧ пырысьтӧм-пыр тшӧктіс лӧсьӧдны выль кӧмкот да сетны Бухарин ёртлы. Сӧмын пӧ колӧ сідзи вӧчны, медым Бухарин ёрт эз ӧткажитчы кӧмкотсӧ босьтӧмысь.

Ленин ёрт ас вӧснаыс некор эз тӧждысьлы, асьсӧ эз видзлы. Кымыныськӧ эськӧ Политическӧй бюро (коммунист партия Центральнӧй Комитет вылын юралысь бюро) шуліс Ленин ёртлы мырдӧн сетны шойччӧг. Ленин ёрт некор эз кывзыв бюролысь шойччӧг сетӧм йылысь, отпускӧ эз петавлы. Та кузя сӧмын Ленин ёрт эз вӧчлы партиялысь тшӧктӧм, эз кывзыв партийнӧй дисциплина.

Ме помнита ӧти вӧлӧмтор: мунӧ вӧлі Совнаркомлӧн (Народнӧй Комиссаръяслӧн Сӧвет) пукалӧм (заседанньӧ). Ильичлы эз вӧв лӧсьыд сьӧлӧм вылас, сӧмын сійӧс зілис миянысь дзебны. Вӧзйысис пукалӧм вылысь петавны вит минут кежлӧ. Ставным ми вӧлі тӧдам — сылӧн гӧтырыс Надежда Константиновна ёна вӧлі висьӧ. Сы ордӧ чукӧртчӧмаӧсь вӧлі врачьяс. Сэтчӧ и вӧзйысис Ильич. Сійӧ петӧм бӧрти Совнарком шуис пукалӧмсӧ тупкыны да аскиа лунас вӧчны.

Владимир Ильич вит минут бӧрти бӧр локтіс. Некыдзи эг вермӧ тшӧктыны сійӧс аскиа лун кежлӧ вуджӧдны пукалӧм. Казяліс мортыд — ми дзик сы вӧсна и кӧсйим дугӧдлыны пукалӧмсӧ. Сыла и эз сӧгласитчы Владимир Ильич тупкыны пукалӧм.

Н. И. Ульянов.