ЛЕНИН ДА КООПЕРАЦИЯ

Коли ӧти во миян велӧдысь Ленин ёрт кулӧмсянь. Ленин ёрт кулі, да сылӧн уджыс, велӧдӧмыс ловъя.

Кӧсйысим, сетім ми ставным Ленин гу дорын кыв нуӧдны чорыда уджнымӧс водзӧ сійӧ велӧдӧм серти.

Медбӧръя гижӧдъясыс Ленин ёртлӧн вӧлі кооперация йылысь.

Медбӧръя гижӧдъясас Ленин висьталіс, кыдзикӧн кооперация вылӧ видзӧдны колӧ, кыдзикӧн лэптыны, кыпӧдны сійӧс. Паськыда ӧтувтны кооперативъясӧ став уджалысь йӧзӧс велӧдіс Ленин. «Уджалысь йӧз сӧмын кооперацияӧ ӧтувтчӧмӧн югыд бур олӧмӧ вермасны воны. Сӧмын кооперация пыр став крестьяна ассьыныс олӧмнысӧ вермасны кыпӧдны, асьнысӧ югдӧдны. Колӧ быд ногӧн кооперациялы отсавны, мед сійӧ унджыкӧс ӧтувтны ас пытшкас вермис, мед бураджык ассьыс нуӧдіс уджсӧ, мед кокньӧдны ӧтувтӧм йӧзлысь сьӧкыд олӧмсӧ вермис». — Тадзикӧн велӧдіс Ленин.

Ленин ёрт висьталіс кооперациялысь пӧльзасӧ, висьталіс донсӧ Сӧвет власьт улын уджалысь кооперациялысь.

Огӧ вунӧдӧй тайӧ дона тшӧктӧмъяссӧ! Нуӧдам помӧдз сійӧ тшӧктӧм кузя ассьыным уджнымӧс. Ёнмӧдам, кыпӧдам кооперацияӧс, отсалам сылы мый вермам, ӧтувтчам ставным, кыдз тшӧктіс бур велӧдысь Ленин!

Ал. Попов.