ЛЕНИН ДА НЫВБАБА

Тайӧ лунъясӧ нывбабалы сьӧлӧмсянь колӧ казьтыштны на понда нэм чӧжыс тӧждысьысь Ленин ёртӧс. Октябрса революция пансьытӧдз на Ленин ёрт шуліс: «Капиталистъяслысь власьт вермам жугӧдны сӧмын нывбабаяскӧд ӧтвылысь. Нывбабалӧн олӧм капиталистъяс власьт дырйи медся нин дзескыд. Роботничалӧн да крестьянкалӧн абу некутшӧм права. Капиталист законъяс некор эз лыддьывлыны нывбабаӧс мужикъяскӧд ӧткодьӧн. Нывбабаяс нэм чӧжыс оз тӧдлыны кокньыдджык олӧм. Лоӧ вӧлі налы уджавны горт гӧгӧрын, семья пӧвстын уна сьӧкыд сьӧд удж. Сёян-юан семьялы лӧсьӧдӧмысь, скӧтъяскӧд ноксьӧмысь, мыськалӧмысь, пелькӧдӧмысь да мукӧд сэтшӧм уджыс кындзи найӧ нинӧмтор эз вӧчлыны. Колӧ быд ногӧн кокньӧдны налысь олӧм.

Мыйӧн лои Октябрса революция, пырысь-пыр Сӧвет власьт лэдзис выль законъяс нывбабалы права сетӧм йылысь. Сы понда налы колӧ казьтывны Октябрса Революцияӧс кыдз быттьӧ чужан лун. Татшӧм законъяс понда медся нин ёна тӧждысис вунӧдлытӧм Ленин ёрт.

Крестьяна пӧвстын дзикӧдз ӧткодявны нывбабаӧс мужиккӧд ӧні некыдзи на он вермы, кытчӧдз став йӧзыс оз кутны овны ӧтвылысь. Ленин та йылысь ёна мӧвпаліс. Шуӧ вӧлі: «Колӧ пӧ ньӧжйӧникӧн быд ногӧн кокньӧдны нывбабалысь олӧм. Колӧ пӧ нывбабалы аслыныс босьтчывны асьнысӧ мездыны да велӧдчыны ӧтвылысь овны да уджавны мукӧдкӧд».

Уджалысь йӧз понда нэм чӧж мырсьысь Ленин ёрт во нин абу. Коли сылӧн сӧмын велӧдӧмыс, бур кывъясыс. Став нывбабалы колӧ сьӧлӧмсянь кывзыны сылысь велӧдӧмсӧ, кутчысьны овны сійӧ велӧдӧм серти, коммунист партиякӧд ӧтвылысь. Колӧ мырсьыны быд ногӧн кокньӧдны олӧм, паськӧдны юр вежӧр, мездысьны нинӧм абутӧмъяслы эскӧмъясысь.

Н. П.