ЛЕНИН
«Лов миян кувны оз вермы
Ловлы оз волывлы пом».
М. Лебедев.

Пӧратӧг, кадтӧг миянӧс колис —
Уджалігкості-с кулі Ильич.
Эмбуртӧм йӧзлӧн юралысь быри,
Уджалысь йӧзыс колины сідз...

Кыдзи тай челядь кольӧны батьтӧг:
Томиник нывъяс, ичӧтик пи...
Кыдзи тай найӧ шогсьӧны ёна,
Сідзи и ӧні дзуглясям ми.

Ленинлӧн нимыс миянлы дона,
Сійӧн и кутам сьӧлӧмын шог;
Сэтшӧмыд нэмнас уна оз овлы,
Вӧлі да-й быри — бӧрлань оз лок...

Му вылын ӧтнас кыпӧдіс йӧзӧс,
Индаліс туйяс, велӧдіс бур;
Эмбуртӧм йӧзлы уджаліс нэмсӧ,
Асьсӧ эз жалит — жугӧдіс юр.

— Вӧлін да-й бырин, ыджыд бур мортӧй!..
Мыйла нӧ дырджык йӧзкӧд эн ов?..
Тэнӧ ми тӧдам... Некор оз вермы,
Донаӧй, тэнад помасьны лов...

Тэнсьыд ми туйтӧ нуӧдам водзӧ!
Тэнад бур уджыд некор оз вош!
Чукӧртчам тэнад партия дінӧ,
Тэнад эм вына том молодёжь.