ЛӦСЬӦДӦНЫ ШОЙЧЧАНІН

Сыктывкарын тулысын и арын быд во чукӧрмылӧ уна йӧз: кер лэдзысьяс, пур кылӧдысьяс, заводӧ уджавны ветлысьяс. Унаысь ветлысь-мунысьяслы лоӧ карын виччысьны паракодъяс дзонь вежонӧдз. Карын патераяс, лэбувъяс абуӧсь, сы понда рабочӧйяслы лоӧ овны ывла вылын, зэр улын. Гӧгӧр няйт.

Татшӧм олӧм зэв сьӧкыд. Колӧ лӧсьӧдны патераяс ли торъя «крестьяна керка» ли.

Обласьтувса удж юкӧд мӧйму тулыс нин тшӧктывліс йӧзӧс уджӧдысь учрежденньӧяслы вӧчны Сыктывкарын керка, да некутшӧм удж оз на тыдав.

Январ 9-ӧд лунӧ Обласьтувса удж юкӧд бара чукӧртліс патераяс лӧсьӧдӧм йылысь сёрнитны сӧвещанньӧ. Волісны: Северолесысь, татчӧс овмӧс юкӧдысь, Русголландлесысь, Надеждинскӧй заводысь, Профсӧветысь да мукӧдлаысь.

Совещанньӧ шуис: колӧ пӧ вӧчны Сыктывкарӧ кык судта керка «Крестьянин керка» да барак 400 мортлы. Тайӧ стрӧйбаяссӧ вӧчны ӧтвылысь. Ковмас шайт 42,000 кымын.

Рӧскод шуисны разӧдны со кыдзи: Северолеслы 25 прӧчент, Русголландлеслы, Русанглолеслы, Транспортлы, Надеждинскӧй заводлы морт 12½ прӧчентӧн, мукӧд 25 прӧчентсӧ карса государственнӧй да кооперативнӧй вузасян учрежденньӧяслы. Керка вӧчны шуисны татчӧс овмӧс юкӧдлы. Кер лэдзны Северолеслы тулыс кежлӧ. Таво гожӧм вӧчны керка улас кирпич фундамент, лэптынысӧ мӧд во гожӧмын. Бараксӧ эштӧдны таво ар кежлӧ.

Крестьяна керка кӧ лоӧ, ветлысь-мунысь рабочӧйяслы оз ковмы туплясьны кӧн веськалӧ. Керка вӧчны важӧн нин вӧлі колӧ.

Микула.