СО КЫДЗИ УДЖДЫСЬӦМАӦСЬ

Кольӧм во, август тӧлысьын, Сыктывкарӧ Гамсянь волісны крестьянаӧн бӧрйӧм мужикъяс, мельнича да лесопилка стрӧитӧм вылӧ, деньга удждыны. Пырӧмаӧсь Сельхозбанкӧ. Сэні шуӧмаӧсь, вайӧ пӧ бумагаяснытӧ да вӧчлам заседанньӧ. Ӧти бумага абу тырмӧма да, бӧр лоӧма мужикъяслы мунны гортаныс куш зептӧн. Недыр мысти вӧчасны судзсьытӧм колан бумагатӧ да бӧр каясны Сыктывкарӧ. Пырасны Сельхозбанкӧ. Сэні шуасны: абу пӧ ладнӧ вӧчӧмныд бумагатӧ. Колі пӧ корлыны Уисполкомысь представительӧс. Сэсся став бумагасьыныд ӧтдор колӧ пӧ вӧчны план да чертёж. Лэччӧдлӧ пӧ техникӧс, мед сійӧ места вылас вӧчас, сыысь ӧтдор колӧ пӧ нӧшта Обисполкомсянь эскӧм. Тадзтӧг пӧ ми тіянлы немтор огӧ сетӧй.

Ёна мырсьӧм бӧрын Обисполком отсалӧмӧн кыдзкӧ да мыйкӧ Сельхозбанк неважӧн удждіс жӧ деньга. Во джын пӧшти лои удждысьны, со кутшӧм сьӧкыд вӧлӧма удждысьнытӧ.

Водзӧ кежлӧ ми сетам Сельхозбанклы сӧвет: мужиклы висьталӧй ӧтпырйӧн, кутшӧм бумагаяс сылы колӧ босьтны банкысь удждысьтӧдз, а не во джынйӧн ӧтарӧ-мӧдарӧ котрӧдлыны.

Петруш Зось.