ВЕЛӦДЧӦМЫСЬ ПОЛӦНЫ

Кӧтшпомса культурно-просветительнӧй кружокын ёртъяс пессьӧны-пессьӧны сувтны бур туй вылӧ, кыссьӧны югыдлань, зільӧны тӧдмавны унатор, но некыдз оз вермыны. Бокисянь — том йӧзсянь, мужикъяссянь — некутшӧм отсӧг абу. Сӧмын букышӧн найӧ видзӧдӧны. Выль воссьӧм лыддьысян керкаын лыддянторъяс эськӧ эм нин, да волысьыс некод абу. Том йӧз медалісны ворсан керка 45 шайтысь кык вежон кежлӧ да сэтчӧ ветлӧны, быд омӧльторсӧ вӧчӧны.

Январ 12-ӧд лунӧ сельсӧветын собранньӧ вылын шуисны лыддьысян керка ломтӧмысь дугӧдчыны. Собранньӧ вылын мужикъяс да ӧткымын том йӧз шуасьӧны вӧтлыны сійӧ керкаысь кружокӧс кытчӧ гажыс, сцена жугӧдны-шыблавны, лыддьысян керка тупкыны, медым пӧ эз вӧв ни оз ло. Шуалӧны, тадзнад пӧ ёнмасны да миянлысь сэсся вичкотӧ босьтасны. Сы вылӧ пӧ пӧвада сетны оз ков, ёна пӧ нин югдӧдісны (просвещайтісны) миянӧс, сӧмын ылӧдлӧны — йӧйясӧс быттьӧ аддзӧмаӧсь. Шефъяс волігӧн пӧ некодлы не волыны. (Найӧ шуӧм ног эськӧ оз ло да). Ёна уна мать да шум вӧлі собранньӧ вылын. (Со ӧд кутшӧм миян сӧгласа йӧзыс.)

Медъён гӧлӧса, медыджыд налӧн — Лука Семӧ Иван. Сійӧ аслас ён гӧлӧсӧн, быдсяма омӧль понъясян кывнас оз лэдз собранньӧ нуӧдны — вевттьӧ, сы бӧрся вӧтчӧны ӧткымынъяс мукӧд. (Оз эськӧ ков татшӧмъяссӧ собранньӧ вылас сибӧдны да).

Кӧтшпомса ёртъяс, мӧвпыштлӧй прамӧйджыка да шыбитӧй ассьыныд лёкногаса олӧмнытӧ.

Кружокса ёртъяс, мунӧ веськыда, чорыда асланыд выль заводитӧм туйӧд.

Шефъяс, частӧджык видлалӧй.

Лэбач.