СО КУТШӦМ «АРТИСТЪЯС»

Декабр 19 лунӧ Визинсянь Поёлӧ воис со кутшӧм гижӧд: «Завтра 20 декабря к Вам приедет визинская труппа артистов... Отремонтируйте сцену, за что будет уплочено 10 руб. и т. д.»

Мыйӧн татшӧм юӧртӧ лыддим — быдӧн шыньмуніны, зэв сьӧлӧм вылӧ воис ставнымлы. Пырысь-пыр жӧ зэв зіля кутчысим Нардомнымӧс пелькӧдны, сценасӧ шпалеритім и быдӧн. Вӧлӧсьт пасьта юӧртім йӧзлы спектак йылысь.

Гижӧдын урчитӧм срок кежлӧ Нардом тыри йӧзӧн, а артистъяс век абуӧсь. Коркӧ-некоркӧ воисны и артистъяс, ставыс 12 артист, 13-ӧд ямщик, да морт дас кымын гажӧдчысьяс дзудзуля кодьӧсь, мукӧдыс нинӧм нин оз гӧгӧрвоны.

Миянкӧд артистъяс видзӧны асьнысӧ зэв тшапа, шуӧны: ми пӧ комиӧн не умеем. Кор нин виччысьӧм понда терпенньӧ йӧзлӧн кутіс дзикӧдз вошны — ӧти поёлса морт юаліс налысь рочӧн: — кто из вас является руководителем труппы, ведь нужно же начинать, или сделать доклад. — Просим не приказывать, мы ведь вам не приказываем, а то, если захочем, сейчас и обратно, — кутіс воча кыв «роч» артист. Юалысьӧс дрӧж босьтіс, повзис буракӧ да. — Сейчас я сто нибудь висьтала, — шуӧ мӧд артист. Нет пӧ, Миша, не коди, ты пӧ выпивши, неприлично.

Коркӧ кык час да джын мысти заводитчис спектак. Ворсісны часӧн-джынйӧн кымын куим торъя роч пьеса. Ворсӧм вӧлі жебиника.

Ворсӧм бӧрын ми корим сцена лӧсьӧдӧмысь кӧсйысьӧм 10 шайт, миянлы артистъяс кутісны воча кыв: «Заплатит ваше местное п/об., а нам бы вот чайку». Мый вӧчан, быть лои юктӧдны.

Тшай юӧм бӧрын ёна войбыд миян артистъясыд дурӧмаӧсь: жугӧдлӧмаӧсь школа ӧшинь, равзӧмӧн ветлӧмаӧсь сикт кузя, мӧда-мӧд кост волӧмаӧсь пуртъясӧдз. Прӧстӧ страм вӧчисны волӧмнаныс: ӧти-кӧ — тырыс рӧскод, мӧд-кӧ — йӧйтӧдлісны сӧмын йӧзсӧ. Зэв уна омӧльтор найӧ вӧчисны Поёлын, да ставсӧ он понды гижны.

Водзӧ татшӧм артистъясыд оз ковны некодлы.

Синирус.