СЮЗЯЫБЫН

(Висер вожын)

Велӧдчыны зільӧны

Сюзяыбсаяс восьлалӧны водзӧ выль олӧмлань, ыджыд воськолӧн кыссьӧны югыдлань. Декабр 20-ӧд лунӧ дас морт гижсисны судзӧдны «Крестьянская газета» да ӧти морт — «Югыд туй». Газетъяс судзӧдалӧны общественнӧй лавка пыр.

Ӧні школьникъяс тэчсялӧны «Югыд туй» газет судзӧдӧм вылӧ. Кӧсйӧны сэсся лыддьыны сійӧс чукӧртчӧмъяс вылын, войпуканінъясын.

Том йӧз зільӧны велӧдчыны, зільӧны лӧсьӧдны выль нога олӧм. Унаысь чукӧртчывлӧны лыддьысьны общественнӧй лавкаӧ, вӧчлывлӧны школаын спектакъяс.

Зэв эськӧ колантор да бур вӧлі, восьтісны кӧ миян грездӧ лыддьысян керка. Ӧні эськӧ эм сэтшӧмыс — вит-квайт морт тэчсьӧмӧн асланыс тшӧт вылӧ медалісны ӧти комната — да ог тӧд, дыр-ӧ вермасны видзны. Патерасьыс зэв уна босьтӧны, а отсавны бур вӧчысьяслы огӧ вермӧй: Сюзяыбсаяс гӧльӧсь, нажӧтка некутшӧм абу; спектакъясысь деньга этша чукӧрмӧ. Надейтчам, Уоно отсалас миянлы.