КОМИӦДЧӦМ
Комиӧдчӧм удж надзӧник век водзӧ мунӧ, пондіс тӧдчыны коми йӧз олӧмын. Коми крестьяна дугӧдчӧны асьнысӧ увтыртӧмысь, коми йӧзӧс мукӧд сёрниа йӧзысь улӧджык пуктӧмысь. Оз кидтысьны асланыс сёрнисьыныс, крестьяна дінӧ локтысь войтырӧс быдлаын тшӧктӧны сёрнитны (докладъяс вӧчны) комиӧн.
Мый тайӧ петкӧдлӧ?
Ӧти-кӧ — коми крестьянин оз сӧмын кывзыны кӧсйы, кӧсйӧ гӧгӧрвоны выль ӧнія олӧм йылысь висьталӧм. Гӧгӧрвоысь крестьянин мырсьӧ ассьыс олӧмсӧ выль ног лӧсьӧдны.
Мӧд-кӧ — комиӧдчан удж паськалӧмӧн коми йӧз ёнджыка асьнысӧ гӧгӧрвоӧны, ассьыныс выннысӧ, сямлуннысӧ аддзӧны, ас выланыс надеяныс ёнджыка содӧ. Кор коми йӧз асьнысӧ дзикӧдз гӧгӧрвоасны, сэки ёнджыка пондас тӧдчыны гӧля-озыра торъялӧм, пондасны кыссьыны став сёрни сикаса гӧль уджалысьяскӧд ӧтувтчӧмӧ.
Сідз жӧ миянлы колӧ ёнджыка босьтчӧдны, чорзьӧдны тайӧ уджсӧ.
Медвойдӧр колӧ лӧсьӧдны татӧні быдмысь уджалысьясӧс. Коді коми крестьяна пӧвстын быдмӧма, налысь уджсӧ ачыс вӧчлӧма, сійӧ ёнджыка тӧдӧ крестьянинлысь оласногсӧ, нуждаяссӧ, бурджыка кужӧ сылы отсавны. Сійӧн колӧ ёнджыка велӧдны коми крестьяна пиянӧс.
Велӧдны позьӧ уна ног. Позьӧ велӧдны ылӧсас, важ ног, сӧмын сідзи бур уджалысьӧс он вермы лӧсьӧдны. Позьӧ регыдӧн бур уджалысьӧс артмӧдны. Бур уджалысь вермас петны сэк, кор велӧдасны мыйӧ, кӧні, кыдзи ковмас сылы уджавны. Коми йӧз пӧвстын уджавны лӧсьӧдчысьяслы колӧ бура тӧдмавны коми йӧзлысь оласногсӧ (важсӧ и ӧніясӧ), Коми мусӧ, озырлунсӧ сылысь, мед вермасны мӧвпавны водзвыв, кутшӧм олӧм лоӧ коми йӧзлӧн Коми муын (бур уджалысьлы, дерт, колӧ тшӧтш тӧдны ставмувывса оласног законъяссӧ, сы йылысь ме ог нин и сёрнит).
Сэсся колӧ ёнджыка лэдзны ас кывйӧн литература, медым крестьяналӧн вӧлі быдтор йылысь векися велӧдысь. Ӧні коми нига лэдзанін лӧсьӧдалӧ нигаяс видз-му уджалӧм йылысь, быдсяма висьӧмъясысь видзчысьӧм йылысь, мукӧдтор йылысь.
Но босьтчӧдны Коми му, коми йӧзӧс, вынсьӧдны тані выль оласног ми вермам кор миян тані лоӧны пабрик-заводъяс, кор лоӧ асланым пролетариат. Медуна вын миян ковмас пуктыны татчӧ пабрик-заводъяссӧ лӧсьӧдӧм вылӧ. Сэтчаньӧ и мырсьӧ миян Обисполком.
