ИСПОЛКОМ АБУ МЫЖА

(Вочакыв П-овлы да Вой шӧрлы)

«Югыд туй» газетын декабр 16-лунсяын №252-ын П-ов да Вой шӧр «Тракнитантор» статьяын гижӧмаӧсь: Одыб вӧлӧсьтса (Кулӧмдін уездса) гӧльджык крестьяналы пӧ таво лои налог мынтыны унджык озырджык крестьяна дорысь дай ещӧ на пӧ озырджык крестьяналы сеталісны льготаяс. Сэсся пӧ вӧлі дзебӧмаӧсь учётысь скӧтъяс. Ставсьыс таысь менӧ мыждӧны. Ме та вылӧ со мый висьтала: Ноябр тӧлысьын 23-ӧд лунӧ граждана собранньӧ вылын вӧлі лыддьӧма налогӧвӧй списоксӧ. Собранньӧ кывзӧм бӧрын тайӧ списоктӧ видлалісны ещӧ на вӧлӧсьтувса съезд вылын.

Декабр 3-ӧд лунӧ финансӧвӧй инспектура Волисполкомкӧд видлалісны, тӧдмалісны, абу-ӧ вӧлӧсьтын дзебӧма учётысь скӧтъяс. Сэки сэтшӧм котыр сюри. Рытнас сійӧ луннас жӧ чукӧртлім скод, кӧні вӧлі сёрни, коді мыжа скӧт дзебӧмысь, Исполком али абу. Йӧзыс скод вылын шуисны: Исполком пӧ сыысь абу мыжа. Сійӧ пӧ босьтліс скӧтӧс учёт вылӧ юнь тӧлысьын. Учёт вылӧ босьтігӧн йӧзӧс кырымӧдавліс, мый найӧ висьталӧны ставсӧ, мыйта эм налӧн, скӧтсӧ. Сэсся скод вылын шуисны Исполкомлы корсьны став скӧтсӧ, коді эз веськав учёт вылӧ. Сійӧ уджсӧ Исполком вӧчис дай сюрӧм скӧт вылӧ быдӧнлы налогсӧ пукталіс.

Налогысь льготаяс сеталіс сы вылӧ лӧсьӧдӧм комиссия, а эг ме. Дерт, комиссияыд льготаястӧ сеталіс кодлы вӧлі колӧ да позьӧ. Озырджык крестьяналы, дерт, эз сет некутшӧм льгота.

Одыбса Исполкомын юралысь Жижов.