МУ-ВИДЗ ЛӦСЬӦДАН УДЖ ЙЫЛЫСЬ

Кӧдзвыв вӧлӧсьтын (Сыктыв уездын) декабр 29 лунӧ вӧлі собранньӧ 2-ӧд, 3-ӧд да 4-ӧд десятаса гражданалӧн. Сэні сёрнитісны му-видз лӧсьӧдан удж йылысь (о землеустроительных работах).

Му-видз лӧсьӧдан удж Кӧдзвыв вӧлӧсьтын зэв ёна колӧ. Колян во нин кӧсйылісны тайӧ уджсӧ нуӧдны, сӧмын лои нюжӧдчыны ӧнӧдз сьӧм абутӧмла.

Му-видз лӧсьӧдӧмын колӧ нуӧдны куим пӧлӧс удж. Ӧти-кӧ — лӧсьӧдны орчча вӧлӧсьтъяскӧд межаяс (границы), медым быд мортлы воӧ вӧлі 7 десятинаӧн му-виддзыс. Вӧлӧсьтын 4500 морт. Сідзкӧ му-видз колӧ вӧлӧсьтлы 31500 десятина. Тайӧ уджсӧ нуӧдӧм вылӧ колӧ сьӧм 15000 шайт кымын. Мӧд пӧлӧс уджыс — юкны му-видз десятаяс костын. Та вылӧ сьӧм ковмас 4000 шайт кымын. Сэсся коймӧд пӧлӧс уджыс — колӧ юкны му-видз быд керкалы, быд кӧзяйство вылӧ. Татчӧ сьӧм колӧ 5000 шайт гӧгӧр.

Собранньӧ вылын шуисны: медрегыдӧн пӧ колӧ лӧсьӧдавны межаяс орчча вӧлӧсьтъяскӧд. Сэні заводиталӧны нин му-видз лӧсьӧдан уджсӧ нуӧдны, дай найӧ зільӧны босьтавны бурджыкинъяс. Сідзи вӧлі Слӧбӧда вӧлӧсьткӧд. Сэсся ӧні лэдзӧны сортовка вӧрысь, коді эськӧ му-видз лӧсьӧдан удж бӧрын петіс крестьяналы колан вӧр вылӧ (леса местного значения). Сэсся колӧ лӧсьӧдны чорыд межа каркӧд.

Медыджыд да колан торйыс тайӧ уджсӧ нуӧдӧмын — сьӧм. Крестьяна шуӧны: ми пӧ зілям ас костысь чукӧртны тайӧ сьӧмсӧ. Ме ог тӧд, чукӧрмас оз кыдзкӧ. Сельхозбанк вель дыр кежлӧ му-видз лӧсьӧдан удж вылӧ сетӧ 75% став уджсӧ нуӧдӧм вылӧ колан сьӧмсьыс. Сыысь сійӧ босьтӧ 6%-ӧн воысь. Ме чайта, крестьяналӧн асланыс мыйта колӧ сьӧм ӧтпырйӧ оз чукӧрмы. Колӧ Сельхозбанкыслысь сьӧмсӧ удждыны. Вочасӧн мынтыны, дерт, крестьяна сылы вермасны. Волисполкомлы колӧ та йылысь мӧвпыштны регыдджык, колӧ код ногӧн кӧ чукӧртны сьӧм.

Му-видз лӧсьӧдан удж Кӧдзвыв вӧлӧсьтын колӧ нуӧдны тайӧ кык воӧн. Оз ков крестьяналы нюжӧдчыны, мукӧд водзын кольччыны бӧрӧ.

Жеребцов-Робур.