МЫЙ ВӦСНА КОММУНИСТ ПАРТИЯ ОЗ ОШКЫ ТРОЦКӦЙ ЁРТӦС

Ӧні сиктъясын кывлісны нин либӧ лыддявлісны газетъясысь коммунист партияӧн Троцкӧй ёрт вылӧ шуасьӧм йылысь, сылысь медбӧръя висьтавлӧмсӧ омӧльтӧм йылысь. Мыйла нӧ сідзи? Троцкӧй ёрт зэв бур уджалысь вӧлі, ӧні друг сійӧс ставнас коммунист партия оз ошкы, омӧльтӧ. Мый сійӧ омӧльторсӧ, неладнӧ ногсӧ вӧчис?

Тайӧ Троцкӧй ёртӧс ошкытӧмыс лои со мыйла: Троцкӧй ёрт гижис книга 1917 вося Октябрса революция йылысь. Сійӧ книгаас гижӧма миян революция йылысь абу сідзи, кыдзи мунліс збыльысьсӧ революцияыс. Сы вӧсна книгаын гижӧма водзӧ кежлӧ удж нуӧдӧм йылысь не сідзи, кыдзи эськӧ колӧ. Аслас книгаын Троцкӧй ёрт тшӧктӧ велӧдчыны миян революция мунӧм вылысь, миян революция история вылысь. Сійӧ ачыс революциялысь историясӧ оз веськыда, оз сідзи, код ногӧн мунліс, висьтав. Ми кӧ кутам велӧдчыны водзӧ уджавны Троцкӧйӧн гижӧм книга серти, вермас лоны ыджыд омӧльтор. Аслас книгаын Троцкӧй ёрт висьталӧ, сувтӧ паныд миян партияса Центральнӧй Комитетлы дай паныд Коминтернӧн удж сямсӧ нуӧдӧмлы.

Тайӧ кӧ эськӧ сӧмын вӧлі, нинӧм на. Коммунист партия эськӧ эз ошкышт ассьыс шленсӧ — Троцкӧйӧс, сылысь висьталӧмсӧ, шуис: тэ пӧ, ёрт, неладнӧ сёрнитан, со пӧ кыдзи вӧлі, со пӧ кыдзи колӧ сёрнитны, со пӧ кыдзи колӧ водзӧ уджавны — дай пом. Сӧмын абу на тайӧ ставыс. Троцкӧй ёртлӧн бӧръявылын дай аслас ӧнія книгаын тӧдчӧ шуасьӧм: ме пӧ и войдӧр, Октябрса революцияӧдз, мунлі веськыд, ён бур туйӧд. Сійӧ ӧні дорйӧ ассьыс воддзася, 1917 вося революцияӧдз революция вылӧ видзӧдӧм, код ногӧнджык революциясӧ колӧ нуӧдны.

Унаӧн на ӧд оз тӧдны — Троцкӧй ёрт пырис миян коммунист партияӧ сӧмын 1917 воын гожӧмнас. Сэтчӧдз сійӧ вермасьліс большевикъяскӧд, большевикъяслы паныд книгаяс, статьяяс гижавліс, мунліс ӧтвыв меньшевикъяскӧд большевикъясӧс вермалӧм вылӧ. Сійӧ медчорыд кывъясӧн видлывліс Ленин ёртӧс.

«Мый нӧ важсӧ казьтывны, важӧн ылавлӧмысь видны (осуждать) Троцкӧй ёртӧс? Ылавлыны ӧд быдӧн вермасны», — шуасны мукӧд. Дерт, эськӧ нинӧмла важ ылавлӧм казьтывны, эз кӧ Троцкӧй ёрт ӧні кут шуны: «Мый ме войдӧр дорйылі, шулі дай мунлі тіянлы паныд, ӧні ставыс сійӧ збыльӧ пӧри, збыль (правда) вӧлӧма». Быдӧн гӧгӧрвоасны: збыль кӧ вӧлӧма Троцкӧйлӧн шуӧмъясыс, збыль кӧ вӧлӧма сылӧн важ уджыс, абу збыль инӧ, абу вернӧ Ленин ёртлӧн велӧдӧмыс.

Сідзкӧ колӧ ленинизм вежны троцкизм вылӧ, Ленин туйысь ӧткажитчыны да сувтны Троцкӧйӧн индӧм туй вылӧ. Со та ногӧнсӧ миян партия и оз вермы вӧчны, тайӧс оз вермы, оз позь босьтны. Кутшӧм медыджыд, медъён войдӧрся ылавлӧмыс Троцкӧй ёртлӧн? — Со кутшӧм: Троцкӧй ёрт эз лыддьыв крестьянаӧс вынӧн, коді эськӧ вермис отсавны эмбуртӧмъяс революциялы. Тайӧ медъён ылавлӧм Троцкӧйлӧн. Сійӧ та кузя эз ӧтчыд вензьыв Ленин ёрткӧд. Тайӧ ассьыс ылавлӧмсӧ Троцкӧй ёрт дорйыліс 1905 восянь. Сэки кӧ ми кывзім Троцкӧйлысь, сувтім ас уджӧн сійӧ туй вылӧ, миян революция эськӧ воши, кусі.

Бара шуам: эз кӧ Троцкӧй ёрт тайӧ важ ылавлӧмсӧ кут дорйыны ӧні, омӧльыс нинӧм эз вермы лоны. Сӧмын Троцкӧй ёрт ӧні пыр кутшӧмкӧ ыджыд удж вӧчигӧн важ ылавлӧмас бӧр воӧ. Со мыйӧн тайӧ омӧль, со мыйла коммунист партия оз ошкы Троцкӧй ёртӧс, со мыйла партия тшӧктӧ, медым Троцкӧй ёрт быдӧнлы кывлӧмӧн ӧткажитчас водзӧ кежлӧ ас важ ылавлӧмысь, со мыйла тшӧктӧ Троцкӧй ёртлы, медым сійӧ эз мун паныд Центральнӧй Комитетлы, Коминтернӧн веськыд визьӧд удж нуӧдӧмлы. Кодлы уна сетӧма, сылысь уна и босьтчӧ. Миян партия, кӧть тэ сэні ещӧ ыджыд удж ну, ылалан кӧ, вешъян кӧ партияӧн удж нуӧдӧм туйысь, веськыда шуас тэныд сы йылысь, веськыда зіляс сувтӧдны аслас туй вылӧ, веськыда шуас: «Верман тэ аслад важ ылалӧмтӧ тӧд вылад уськӧдлыны, сӧмын сы ногӧн миянӧс уджавны не тшӧктыны, аслыд сідзи водзӧ не уджавны». Со мый вӧсна коммунист партия ӧні ёна видзӧдӧ Троцкӧй ёрт важ ногӧн висьтавлӧм вылӧ, вӧчалӧ собранньӧяс, сёрнитӧ, гижӧ статьяяс.

Коммунист партия вӧчӧ сідзи, мед быдӧн гӧгӧрвоасны — миян вензьӧм мунӧ оз сы вӧсна, кодӧс ыджыдӧн, велӧдысьӧн, миянӧс нуӧдысьӧн лыддьыны. Ленин ёрт кулӧм бӧрти миянӧс нуӧдысь сӧмын ӧти — Рочмувывса Большевик Коммунист партиялӧн Центральнӧй Комитетыс.

Миян вензьӧм мунӧ сы вӧсна, кутамӧ-ӧ ми водзӧ нуны уджсӧ Ленин ёрт шуӧм серти, кодкӧд ми, большевикъяс, мунім ӧтвылысь кызь воысь нин дырджык, али кутам мунны чукля, лёк, ылалӧм туйӧд, код вывті мунліс Троцкӧй ёрт 1917 воӧдз да код вылӧ сійӧ ӧні бара кӧсйӧ кежны Ленин ёртӧн индӧм туй южысь.

Ем. Яр.