ПОСНИ ЧЕЛЯДЬЛӦН ПИОНЕРСКӦЙ ЧУКӦРЪЯСӦ ӦТУВТЧӦМ

Рабочӧйлӧн да крестьяналӧн челядь ӧні быдлаын, став му пасьталаыс кутіс ӧтувтчыны, артельтчыны пионерскӧй чукӧръясӧ. Сэтшӧм чукӧръясын челядь велӧдчӧны овны, уджавны да лӧсьӧдны выль олӧм.

Комсомол пионеръясӧс велӧдӧ уджавны, нуӧдӧ Владимир Ильич Ленин туйӧд.

Пионеръяслӧн эм асланыс законъяс. Сэні шуӧма, кутшӧмӧн колӧ лоны пионеръяслы:

1. Пионер сулалӧ уджалысь йӧз дор, мунӧ Владимир Ильич Ленин туйӧд.

2. Пионер медся ичӧт вок да бур отсӧг комсомоллы да коммунист партиялы.

3. Пионер — том ёрт ставмувывса пионеръяслы, став уджалысь йӧзлы.

4. Пионер чукӧртӧ, ӧтувтчӧдӧ став челядьсӧ да велӧдӧ найӧс выль олӧм лӧсьӧдны.

5. Пионер сьӧлӧмсянь ёна велӧдчӧ.

Тайӧ законъяс кындзи эм пионеръяслӧн ещӧ олан сям йылысь:

1. Пионер видзӧ дзоньвидзалун ассьыс дай йӧзлысь; асылын чеччӧ водз, мичаа мыссьӧ да вӧчӧ гимнастика.

2. Пионер весьшӧрӧ кад ассьыс ни йӧзлысь оз колляв, удж вӧчӧ мичаа, тэрыба.

3. Пионер сюсь, зіль — кужӧ уджавны артельӧн ӧтувтчӧмӧн, уджысь оз пов, быд пикӧ воӧмысь вермӧ петны.

4. Сійӧ оз видз ас чукӧрса эмбур, мичаа видзӧ книгаяс, ассьыс паськӧмсӧ да велӧдчан кӧлуйсӧ.

Миянлы, уджалысь йӧзлы, колӧ быд ногӧн пионеръяслы отсавны.

П.