УДЖАЛЫСЬ ЙӦЗӦС МАТЫСТНЫ СӦВЕТЪЯС ДОРӦ
МӦСКУА. Январ 8 лунӧ Ставсоюзса сӧветскӧй удж бурмӧдны кутчысян съезд вылын Каганович аслас докладын шуис: миян сӧветъяс пӧ неуна вешйисны войнаяс дырся олӧмысь шы ни тӧв олӧмлань, сӧмын уджсӧ нуӧдӧны войнадырся нуӧдӧм моз на. Войнаяс дырйиыд ӧд, дерт, лоӧ вӧлі мырдӧн-сорӧн нуӧдавны быдсяма пӧлӧс уджсӧ. Сэсся бура удж сувтӧдӧмӧс ӧнӧдз ёна торкис быдӧнлы вузасьны вӧля сетӧм. Выль экономическӧй политикаыд сетіс йӧзыдлы, государстволы уна бур. Мӧдарӧ кӧ шуны, сетіс и лёк, лоины взяткаяс, ыджыдӧ пуксьӧм, ылӧдчӧм. Миянлы ӧні сы вӧсна колӧ чорыда босьтчыны сӧветъясын удж бурмӧдӧм вылӧ.
Став йӧзыслысь колӧ вежӧрсӧ сэтшӧмӧдз лэптыны, мед быдӧн водзӧ кужасны тӧдмавны сӧветъяслысь удж, мед кужасны корсьны омӧльлунсӧ сылысь да вештыны сійӧс. Мед водзӧ уджалысь йӧз ӧтувтчисны чорыда сӧветъяскӧд, мед уджалісны ёна ӧтвылысь, ӧти туйӧд мунісны.
Ӧнісянь ковмас босьтчывны чорыда уджавны крестьяналысь овмӧс кыпӧдӧм вылын, йӧзӧс югдӧдӧм вылын, вӧлӧсьтса бюджет ёнмӧдӧм вылын да мукӧд пӧлӧс буртор вӧчӧм вылын. Сэсся колӧ босьтчывны взяточникъяскӧд, ыджыдӧ пуксьысьяскӧд да ылӧдчысьяскӧд ещӧ на чорыда вермасьны. Тайӧ вермасьӧм вылӧ колӧ лэдзны
