АРЕСТУЙТӦМАӦСЬ РАДИЧӦС

Вена. Хорват крестьяна партияын юралысьӧс, Радичӧс, арестуйтӧмаӧсь Загреб карын зять керкаас. Арестуйтӧм бӧрас быттьӧ пӧ сюрӧма Радичлӧн гуся архив. Югославияса пытшкӧсса делӧяс нуӧдысь министр шуӧ, архивса бумага пӧвстысь пӧ сюри Тодор Александровсянь Радичлы письмӧ Македонияын вермасьны кутчысьӧм йылысь да крестьяна Интернационал да Радич костын гижасьӧм письмӧяс. Быттьӧ пӧ мукӧд письмӧяссӧ кырымалӧмаӧсь Красин да Смирнов. Радичлысь став матігӧгӧрса отсасьысь ёртъяссӧ арестуйталӧмаӧсь. Югославия правительство повзьӧма Радичӧс да сылысь ёртъяссӧ арестуйтӧм понда крестьянаӧн бунт кыпӧдӧмысь да сувтӧдӧма кок вылӧ войскасӧ. Крестьяна партия правительство шуӧма помӧдз тупкыны.

Редакциясянь. Колян войнаясӧдз ӧнія Югославияын вӧліны: сербъяс (асшӧра королевство), хорватъяс да словенечьяс (вӧліны Австро-Венгрия улын). Война бӧрын Австрия улысь хорватъясӧс да словенечьясӧс сетісны Сербия королевстволы да сэсянь и пондісны шуны Югославияӧн.

Хорватъяс корӧны восьтыны асланыс парламент да мырсьӧны торйӧдчыны Югославияысь асшӧра республикаӧ. Медыджыд карӧн (столичаӧн) шуӧны Загреб кар. Югославия парламентын унаысь нин кыптыліс та понда гырысь зыкъяс. Радичлӧн партияыс ёна вӧлі мырсьӧ асшӧра олӧм лӧсьӧдӧм вылын. Партия абу зэв омӧль, бурӧн, дерт, оз сетчы. Парламентын 70 бӧрйӧм хорват морт. Унджык йӧзыс Югославияын сулалӧ СССР дор, сӧмын правительствоыс да буржуйясыс вӧчӧны мӧдарӧ.