КЫДЗИ ОЗ КОВ УДЖАВНЫ

«Муніс, муніс да некытчӧ эз во»

Ноябр 10 лунӧ Мордінса учительяс ӧтувтчӧмӧ (союз Всеработпрос) воӧма гижӧд Кулӧмдін карувса учительяс ӧтувтчӧмсянь, корӧны вӧлӧм ӧти учительӧс съезд вылӧ Кулӧмдінӧ ноябр 25-ӧд лун кежлӧ. Мордінса учительяслӧн бӧрйӧм мортыс Тюрнин ёрт мӧдӧдчӧма сэтчӧ, но Кӧрткерӧсын воӧма телеграмма Кулӧмдінсяньыс, мый съездыс вуджӧдӧма декабр 15 лун вылӧ, сы понда лоӧма бергӧдчыны бӧр. Декабр 15 лун кежлӧ абу на удитӧма мунны — бара съездсӧ вуджӧдӧмаӧсь декабр 25 лун вылӧ. Мӧдӧдчӧма Тюрнин сійӧ лун кежлас — бӧрсяньыс вӧтӧдӧма Кулӧмдінсяньыс гижӧд — ыджыд рӧскод понда Кулӧмдінас абу нин корӧмаӧсь, а тшӧктӧмаӧсь лэччыны Сыктывдінкаргӧгӧрса учительяс чукӧртчылӧм вылӧ, а кор кежлӧ лэччынысӧ — абу урчитӧмаӧсь. Тюрнин ёрт абу нин бергӧдчӧма, а мӧдӧдчӧма, «Югыд туй» газет гижӧд серти №236, Сыктывдінкарад декабр 25-ӧд лун кежлӧ. Кӧрткерӧсын бара жӧ воӧма юӧр: Сыктывдінкарад учительясыд чукӧртчылӧмаӧсь нин, сы понда лоӧма бергӧдчыны бӧр.

Сідзи некутшӧм съезд вылӧ волытӧг Тюрнинлы лоӧма ветлыны кык пӧрйӧ 264 верст и видзны куш прогон вылас кызь (20) шайт саяс дай велӧдтӧг воштыны 15 лун. Сы кындзи сійӧ ветлӧмысь учительяслы некутшӧм пӧльза эз и ло. Сідзи жӧ лоӧма Кӧрткерӧсса да Пезмӧгса учительяскӧд.

Колӧ нин эськӧ сэтшӧмторъяссӧ бырӧдны. Кӧкъямысӧд во нин ӧд ми олам Сӧвет власьт дырйи, колӧ нин велавны прамӧйджыка вӧчны ассьыным удж нуӧдӧмнымӧс.

Газетӧ гижысь