НЬӦЖЙӦНИКӦН ПАЛЯЛӦНЫ

Волсяса (Сыктыв уездса) крестьянаӧс ёна жӧ газетӧ омӧль боксянь кутісны гижны да, ӧткымын грездын найӧ заводитісны садьмыны. Куниб да, Пустӧш да, Шорйыв грездъясын кымынкӧ крестьянин кывлӧмаӧсь ёна мукӧд государствоясын тюрмаясын мучитӧм уджалысь йӧз вӧсна тӧждысьысь мортъяс йылысь. Крестьянин кызь кымын чукӧртӧмаӧсь сьӧм 5 шайт да 25 ур дай вайӧмаӧсь Волисполкомса юралысь ордӧ, шуӧны: тайӧ сьӧмсӧ пӧ ыстӧй капиталист тюрмаясын пукалысь революционеръяслы отсӧг вылӧ. Найӧ жӧ асьныс тшӧктісны гижны коми газетӧ та йылысь. Мед пӧ Волсяса вӧлӧсьтувса грездъясын став крестьянаыс дай став коми йӧзыс тшӧтш миян моз отсаласны.

Кушманов.