КУТШӦМ СИКАС КӦЛУЙ ЛЫДДЬЫНЫ СЕМЬЯСА ШЛЕНЛЫ АСЛАС КӦЛУЙӦН

(77-ӧд статья «Видз-му закон чукӧрысь»)

Миян Коми Обласьтын видз-му комиссияясын зэв уна делӧяс видласьӧны эмбур юкӧм йылысь семья костын юксигӧн. Юксьысьяс унджыкысьсӧ вензьӧны торъя кӧлуйяс вӧсна: вӧв вӧсна, мӧс вӧсна, керка вӧсна, видз-му вӧсна, мукӧдторъяс вӧсна, а оз став овмӧс вӧснаыс.

Видз-му закон чукӧрын 77‐ӧд статья шуӧ: «Семья кост юксигӧн овмӧсыс сӧмын юксьӧ ӧтувъя вӧдитчан эмбур да кӧлуй. Ӧткаа кӧлуйяс, лӧсьӧдӧма кӧ найӧс кодкӧ юксьысь пӧвстысь ас сьӧмыс вылӧ либӧ ачыс вӧчӧма, оз юксьы мукӧдъяслы, а кольсьӧ аслыс лӧсьӧдысьыслы. Сэсся оз юксьы мукӧдъяслы ӧтнасӧн вӧдитчан семьяса шленӧн аслас кӧлуйыс».

Тайӧ статья серти зэв сьӧкыд тӧдмавны, кутшӧм эмбур да кӧлуй овмӧсысь юксьӧ юксьысьяс костын, кутшӧм оз юксьысь.

Колян во ноябр 4-ӧд лунӧ Мӧскуаын Наркомземса Особӧй Коллегия видлаліс ӧти делӧ семья костын юксьӧм понда да шуис: Видз-му закон чукӧрса 77-ӧд статья серти ас кӧлуйӧн семьяса шлен вермӧ лыддьыны сӧмын сэтшӧм кӧлуйяс, коді сылы ӧтнаслы сӧмын колӧ да аслас сьӧм вылас ньӧбӧма: кӧм да паськӧмъяс (одежда, обувь) да ещӧ мукӧд посни кӧлуйяс, коді семьялысь овмӧс нуӧдны оз ков. Став мукӧд кӧлуйясыс да эмбурыс овмӧссьыс, кодъяс колӧны овмӧссӧ нуӧдны да кодъястӧг овмӧсас он вермы овны да уджавны — шусьӧны ӧтувъя эмбурӧн став семьяыслӧн, кӧть мед кутшӧмкӧ кӧлуйяс на пиысь и вӧлі кодӧнкӧ семья пӧвстысь ӧти мортлӧн ньӧбӧма либӧ лӧсьӧдӧма кыдзкӧ мӧд ногӧн. Татшӧм эмбурыс да кӧлуйясыс лоӧны: став стрӧйбаяс, овмӧсыс, став скӧтыс, став сёян-юанторъяс (нянь, пызь, сю, кӧйдыс, картупель, капуста и мукӧд прӧдуктаяс; турун, идзас), став видз-му уджалан кӧлуйяс, додьяс, телегаяс, тӧчилаяс, пилаяс, черъяс да мукӧд сикас став семьялы колан кӧлуйяс овмӧсын.

Та йылысь колӧ тӧдны видз-му комиссияясысь кындзи став гражданалы.

С. Д. Куклин.