ПОШТА КУД

СИЗЬ ПАШЛЫ. Сыктывдінкар. «Кӧтшпомын спектак» статьяыд оз мун.

КӦРТКЕРӦС. Пр. Сп. Поповлы. «Вот сійӧ и лӧсьыд» гижӧдыд оз мун. Мукӧдсӧ лэдзим газетын. Гиж водзӧ.

СЛӦБӦДАСАЛЫ (Удораын). Ыстӧм гижӧдсьыд ӧткымынлаті лэдзим газетын. Гиж водзӧ.

ДОМАШКИНЛЫ. ВИЗИН. Тэ, ёрт, ӧнӧдз узин али олін? Ми чайтам, узин. Октябр тӧлысьын вӧлӧмтор вӧлисти ыстан. Сійӧ эськӧ мед нин. Тэ ӧд ещӧ ыстан колян вося Василей лун (1924 во, январ 1-ӧд лун) празднуйтӧм йылысь. Дзонь во кольӧм мысти гижан. Но и морт!

АЙКАТЫЛАӦ. АЙКАЛЫ. «Места пыдди — кын гӧликӧн» статьяад уна гӧгӧрвотӧминъяс эмӧсь. Гижан: Исаков пӧ Епоӧ ваявліс крестьяналы ковтӧм тӧваръяс. Мыйла сідзи, абу гижӧмыд. Сэсся ревизионнӧй комиссия пӧ аддзис сылысь уджсьыс уна лёктор. Кутшӧм лёктор? Сійӧ лёкторйыс артмис Исаковӧн удж нуӧдны кужтӧмла али нарошнӧ лёкторсӧ вӧчӧма? Сійӧ бара абу гижӧмыд.

Епоса шленъяс собранньӧ вылад эз ӧмӧй вӧвны ревизионнӧй комиссияын уджалысь йӧзыс? Мыйла эз висьтавны собранньӧ вылын лёкторъяс вӧчӧмсӧ? Кутшӧм доносъяс Исаков вӧчавліс Айкинаса коммунист ячейка вылӧ? Мый вӧсна? Ачыс Исаковыс партийнӧй абу? Гиж выль пӧв бурджыка, сэки лэдзам газетын.

КУЛӦМДІН. ВЕТЛЫСЬ-МУНЫСЬЛЫ. Гижӧдъястӧ шыбитім кӧрзинаӧ. Нинӧм абусӧ гижан да. Пань тыр мӧс выйыд мазь вылад колӧкӧ сюри жӧ. Тэ гижан рочӧн, сӧмын омӧля артмӧ. Босьтчыв гижны комиӧн, гашкӧ сямманджык.

СЮЗЯЫБ. ВИСЕР ПИЛЫ. Зэв лӧсьыд, важ серти кӧ тіян югдӧдан удж мунӧджык нин. Бур, школаын велӧдысьыд кӧ ёна уджалӧ, быд ногӧн кӧ отсалӧ. Сӧмын газетӧ гижны нинӧм, ыстӧм статьятӧ абу гижӧмыд, кыдзи важ серти югдӧдан удж ӧддзис, код ногӧн мунӧ тіян удж. Водзӧ виччысям тэсянь гижӧдъяс.

КУЖ СИКТ, Кулӧмдін у. ЧЕР. Тэ, ёрт, гиж сӧмын збыльтор. Ылӧсад гижӧмӧн регыд кыскасны судӧ тэнӧ, дай редакциялы абу лӧсьыд.