КОЛӦ ЧИРЫШТНЫ

Ӧти Пожӧгса крестьянин асланыс Волисполкомысь вайӧма вӧлі Кулӧмдін уездса Исполкомӧ пакетъяс. Кулӧмдінса Уисполкомын уджалысь Соловьёв ёрт вит пакет босьтӧма, а куимӧс некыдзи оз босьт. Абу пӧ сійӧ пакетъясыс миянлы, бӧр пӧ ну Пожӧгса Исполкомад — шуӧ. Крестьянин чуймас: меным пӧ тай нӧ Исполком ставсӧ тшӧктіс лэччӧдны Кулӧмдінӧ, меным бӧр тшӧктӧны нуны Пожӧгӧ. Шыасис мӧд морт дінӧ. Сійӧ крестьянинлысь пакетъястӧ босьтіс.

Мыйла нӧ эськӧ Соловьёв ёртыс эз босьт? Да ӧд ещӧ бӧр тшӧктіс нуны Пожӧгӧ. Вот эськӧ миян бур пошта туйӧн ветлӧдлыштісны пакетъясыд. Абу кӧ ӧд Уисполком ним вылӧ вӧлі ыстӧма пакетъяссӧ, а мукӧд Кулӧмдінса удж нуӧдан юкӧдӧ, эз ӧмӧй нин позь Уисполкомсяньыс ыстыштны сэтчӧ? Колӧ татшӧм уджалысьястӧ чирыштны. Аслыныс кӧ абу муса пакетъяс, дыш кӧ уджавнысӧ, нинӧм йӧзӧс, ещӧ нин сиктса пемыд мортӧс падмӧдӧмысь.

Коми крестьянин.