МЫЙ ШУИСНЫ ВЕЛӦДЫСЬЯС

(Сыктывдінкаргӧгӧрса велӧдысьяслӧн конференция вылын примитӧм резолюцияяс)

Велӧдысьяслы профсоюзын удж нуӧдӧм йылысь.

Горчаков ёрт висьталіс велӧдысьяс йылысь да профсоюзъяс йылысь.

Велӧдысьяс шуисны:

1) велӧдысьяслӧн профсоюз ёна матысмӧдӧ велӧдысьясӧс коммунист партия бердӧ; 2) профсоюз пыр колӧ ёнджыка йитчыны, ӧтувтчыны уджалысь войтыркӧд; 3) крестьянаӧс тӧдмӧдны коммунист партияӧн да сӧвет власьтӧн удж нуӧдӧмӧн; 4) висьтавлыны крестьяналы: ӧтув удж нуӧдӧм, мӧда-мӧдлы отсасьӧм крестьяналы рабочӧйяскӧд сӧмын вермас ёнмӧдны, кыпӧдны, ыдждӧдны Сӧвет республикаяслысь овмӧссӧ, бур олӧм став уджалысь войтырлы лӧсьӧдны; 5) чорыда нуӧдны удж крестьянаӧс кооперативӧ чукӧртӧм понда, пемыдлун (неграмотность) бырӧдӧм понда бура сувтӧдны удж лыддьысян керкаясын; 6) чорыдджыка босьтчыны югдӧдан удж вылӧ Гӧрд Армияын, медся ёна допризывникъяс костын.

Сэсся ещӧ профсоюз йылысь шуисны: 1) ёнджыка кутчысьны профсоюзса удж бердас. Велӧдан удж вылын мырсьысь войтырӧс: гырысь йӧз костын уджалысьясӧс, стӧрӧжъясӧс дай мукӧд пӧлӧс велӧдан удж нуӧдысьясӧс, ӧнӧдз кодъяс эз на вӧвны профсоюзын — чукӧртны велӧдысьяс профсоюзӧ; 2) зільджыка, бурджыка нуӧдны школаса удж, тшӧтш му-видз уджалӧм выль ногӧн лӧсьӧдӧм йылысь; 3) карса велӧдысьяс кольӧны асланыс уджнас бӧрӧджык сиктса велӧдысьясысь; налы колӧ ёнджыка уджсӧ кыпӧдны клубын да профсоюзын; 4) карса велӧдысьяслы колӧ йитчыны сиктса ӧтка велӧдысьяскӧд.

Челядь костын удж нуӧдӧм.

Челядь костын удж нуӧдӧм йылысь кывзӧм бӧрын велӧдысьяс шуисны: челядь таво ёна пырӧны пионер чукӧрӧ. Школаясын велӧдчысь челядь сьӧлӧмсяньыс кутчысьӧны ӧтчукӧра удж бердӧ. Татшӧм уджыс налӧн ёна буртор. Велӧдысьяслы быд ногӧн колӧ налы отсавны уджнысӧ сувтӧдны. Медвойдӧр став неграмотнӧйсӧ пионеръяс костын колӧ велӧдны лыддьыны-гижны. Сэсся школаясын мый вӧсна кӧ велӧдчытӧм челядьлы колӧ тшӧктыны да отсавны пионер чукӧрӧ пырны. Колӧ тӧдмавны пионеръяслысь уджнысӧ, асьнысӧ тшӧтш, медым быд удж панігӧн велӧдысь вермас сетны налы бур отсӧг. Велӧдысьяслы колӧ чорыда кутчысьны отсавны пионеръяслы сюсьмӧдчыны, сӧвмӧдчыны, ас костас йитчыны, выль бур оласног лӧсьӧдны сяммӧдчыны.

Школаясын и быдлаын мед татшӧм уджыс паськалас, мунас ӧтмоза шыльыда, колӧ уджавны велӧдысьяслы комсомолкӧд. Оз ков вунӧдны: челядькостса ӧтувъя удж лӧсьӧдысь миян — коммунист партия комсомол пыр.

Велӧдысьяс олӧм йылысь.

Велӧдысьяслысь олӧм лӧсьӧдӧм йылысь шуисны: 1) оз пӧ ков чинтыны уджалӧмысь ӧнія сетан сьӧмсӧ велӧдысьяслы некыдзи, мырсьыны водзӧ ещӧ на содтыны; 2) бура сувтӧдны пӧрысь, вермытӧм велӧдысьяслы отсалан удж: Обисполком пыр сы вылӧ корны сьӧм. Шыӧдчыны Мӧскуаӧ (Цекпрос) велӧдысьяслы пенсия вылӧ сьӧм лӧсьӧдӧм йылысь; 3) отсавны сиктса судзсьытӧмджык велӧдысьяслы — медвойдӧр газет-книга ыстӧмӧн. Лӧсьӧдчыны велӧдан удж нуӧдан юкӧдъяс пыр (ОБОНО, УОНО) велӧдысьяслы дон босьтӧг патера сетӧм вӧсна, велӧдчыны ветлыны сьӧм сетӧм понда; 4) велӧдысьяслы аскостса уджсӧ нуӧдны Обисполком пыр корны торъя керка либӧ вежӧс (уголок просвещения); 5) велӧдысьяс пиысь унджык войтырӧс мӧдӧдны ёнджыка велӧдчыны ыджыд школаясӧ.