КОММУНИСТ ПАРТИЯӦ ПЫРӦМ ЙЫЛЫСЬ

Колян во уджалысь йӧз уна зілисны пырны Коммунист партияӧ. Уджалысь йӧз ставыс аддзисны — сӧмын Коммунист партия найӧ дор сулалӧ, сӧмын Коммунист партия налы бур олӧм лӧсьӧдӧ, мездӧ нэмӧвӧйя вир пычкӧмысь капиталистъясӧн, буржуйясӧн, сӧмын Коммунист партия Ленин ёрт индӧм веськыд туй кузя мунӧ ставмувывса уджалысь йӧзлы бур олӧм восьтӧмлань, ставмувывса революциялань. Уна уджалысь йӧз эз кӧсйыны кольччыны тайӧ уджысь, найӧ ёна, сьӧлӧмсянь тшӧтш кӧсйисны босьтчыны удж бердӧ Коммунист партияӧ пырӧмӧн.

Медся нин ёна тӧдчыліс пырӧм дай пырисны Коммунист партияӧ Ленин ёрт кулӧм мысти. Тайӧ пырӧмсӧ партия шуис ленинскӧй призывӧн. Сэки пырисны рабочӧйяс ӧтпырйӧ дасъясӧн, сёясӧн. Ставыс сэки пырис Коммунист партияӧ 200 сюрс пабрик-заводъяс вылын уджалысь йӧз. Коммунист партиялы колӧ вӧлі тайӧ выль пырӧм йӧзсӧ бурджыка тӧдмӧдны аслас уджӧн, велӧдны коммунист ногӧн олан сямӧ да уджӧ, колӧ вӧлі партиялы тӧдмавны найӧс. Тайӧ уджыс эз вӧв кокни, тайӧ уджсӧ дзик регыдӧн эз позь вӧчны.

Сы вӧсна Коммунист партиялы лои дугдывны босьтны ас пӧвстас крестьянаӧс. Зэв бур лои партияӧн тадзи вӧчӧм. Сійӧ кокниджыка вермис ленинскӧй призывса пырӧм рабочӧйӧс велӧдны мӧвпавны ас ногыс (воспитать). Ӧні тайӧ уджыс партиялӧн эштіс нин. Сідзкӧ ӧні нинӧмла пыкны сылы выль пырӧмысь Коммунист партия дор сулалысь гӧль да шӧркоддьӧма олысь му-видз бердын уджалысьясӧс. Крестьяна унаӧн зільӧны бур удж вӧчны, найӧ отсалӧны Коммунист партиялы уджсӧ нуӧдны. Сы вӧсна и налы Коммунист партия восьтіс асласӧ пыран ӧдзӧс. Му-видз бердын уджалысь йӧз, кодъяс кӧсйӧны сьӧлӧмсянь нэм чӧжныс уджавны бур долыд олӧм тільсьысь-пессьысь йӧзлы лӧсьӧдӧм вылын, вермасны пырны Коммунист партияӧ.