***

КӦРТКЕРӦС. СПИРА ПРОКӦЛЫ. Велӧдчы гижны комиӧн, рочнас кужан нин. Стихъястӧ колӧ лӧсьӧдлыны аслыд, газетъяссьыд да журналъяссьыд миянлы аслыным уна сюрӧ.

КЫРУВ, ДОМНА ВАСЬӦЛЫ. Тэнад гижӧдъясыд газетӧ оз мунны. Ми редакцияын лӧсьӧдам торъя корка да став тэлӧн кодь картинаа гижӧдъяссӧ кутам вурлыны сэтчӧ, пондам шуны — «киӧн гижӧм картинаа журналӧн». Тэ кӧть, тыдалӧ, ёна на том морт, гижан сьӧлӧмсянь, сӧмын мойдъястӧ абу лӧсьыд газетӧ сюйны. Стихыд Клавдий поп йывсьыд газетӧ оз жӧ пыр — ёна нин гижлӧма попъяс йывсьыд. Гиж водзӧ, шогмас кӧ, сюям газетӧ либӧ вурлам «журналӧ»; мый оз шогмы — дерт, шыбитам кӧрзинаӧ, таысь видзчысь, мырсьы бурджыка, сьӧлӧмсянь гижны.

ГОЖӦМСА ВИСЬЫСЬЛЫ, СЮЗЯЫБ. Тэ лӧсьӧдӧмыд сьыланкывтӧ сӧмын Висерса пельшӧр йылысь. Газетӧ кӧ печатайтам — пондасны сьывны быдлаын, ассьыныс пельшӧрнысӧ кыскавны, кӧть мед сійӧ медся шань морт. Татшӧм стихъястӧ водзӧ эн гиж, сӧмын воштан пӧра. Темаыд ӧд, окота кӧ гижны, сюрӧ уна. Гиж прӧста юӧр.

ВЕТЛЫСЬЛЫ, МОРДІНӦ. Тэ гижан, Чӧддін сиктын пӧ том йӧз видзӧны асьнысӧ омӧля — матьӧн да швачӧн. Босьтчылӧй жӧ ті, водзмӧстчысь йӧз, найӧс югдӧдны, шаньмӧдны.