МИКӦЛА ЭЗ ЮКТӦД

Вӧлӧкпом деревняын (Поёл вӧлӧсьтын, Сыктыв уездын) кӧсйисны йӧзыс зэв бура коллявны праздник — «Микӧла лун» (19-ӧд лунӧ декабрын). Уна лӧсьӧдлӧмаӧсь самӧкуръяс. Сӧмын юныс эз удайтчы — «Микӧла угодникыд» эз гӧститӧд Вӧлӧкпомсаӧс...

Войнас, Микӧлакӧд паныд, воисны сэтчӧ милиционеръяс шобсьыны. Пырисны ӧти озыр крестьянин ордӧ. Пыригмозныс тӧдчӧ вӧлі: самӧкур вӧчӧны керкаас. Юалісны: «Самӧкур эм-абу?» Кӧзяиныс шуӧ: «Огӧ ми сійӧ вӧчлывлӧ». Кутісны шобны. Гӧтырыс мыйкӧ кутіс пищитны, петны керкасьыс: асмогасьны пӧ колӧ... Милиционеръяс петісны посводзас, сэтысь аддзисны кык туис самӧкур, гӧбӧчсьыс бара сюри четверть кымын (тайӧ крестьянинсӧ самӧкур пуӧмсьыс вӧлі штрапуйтӧмаӧсь нин 30 шайт дон).

Нёль ордысь войбыдӧн шобисны да, сюрис кык ведра да джын самӧкурыд.

Асывводзнас кывсьӧма шобсьӧмыд став деревня пасьтаыс да, ставныс петкӧдалӧмаӧсь-дзеблалӧмаӧсь самӧкуртӧ лым пиӧ карта сайясас да гумладоръясас. Аддзасны выль лым чукӧр, шурскӧбтасны сэтчӧ беддьӧн — сэні самӧкур туис либӧ самӧкур пуан кӧлуйныс. Ӧти морт вӧчӧма вӧлі зэв мудера. Кильчӧ вывсьыс лымсӧ чышкӧма чукӧрӧ, сэсся чукӧр вылас... какалӧма. Шобсьысьяс сутшкасны чукӧрад беддьӧн — сэні кык парта самӧкур!..

Ставыс сюрис лым пиысь да керкаясысь квайт ведра да джын гӧгӧр самӧкурыд. Дерт на, уна коли сюртӧгыс. Со ӧд мыйта самӧкур тшӧктӧма пуны Микӧлаыд ичӧтик деревнялы (Вӧлӧкпомын сӧмын 30 керка)!..

Нолтӧ, коми йӧз, артыштӧй: кымын пуд нянь тіян мунӧ Микӧла коддьӧмыслы?

Тадзи оз позь овны. Судӧ кӧ сюранныд, Сӧвет власьтыд оз ошкы самӧкур пуӧмсьыд. Колӧ нин гӧгӧрвоны.

Водзвывса.