ЮГЫДЛАНЬ КЫССЬӦНЫ

Кӧтшпомын (Кӧдзвыв вӧлӧсьтса 9-ӧд десятаын) том йӧз заводитісны мунны югыдлань. Ноябр тӧлысьын организуйтчис культурно-просветительнӧй кружок. Кружокӧ пырисны кызь морт саяс. Таӧдз том йӧзлӧн некутшӧм чукӧртчылӧм эз на вӧвлы. Ӧткымын мужикъяс кружок вылӧ видзӧдӧны букышӧн. Шуӧны — нинӧм абусӧ пӧ вӧчад. Кружок лӧсьӧдіс сцена. Декабр 26-ӧд лунӧ сувтӧдіс спектак, ворсісны: «Олыштан да муса лоӧ». Йӧз зэв нимкодя видзӧдісны. Шуалӧны ас костын: «Миян тай асланым ворсысьясыс вӧлӧмаӧсь». Йӧзыс тшӧктӧны вӧчавны спектаксӧ тшӧкыдджыка. Тайӧ спектакысь чукӧртӧм сьӧмсӧ шуисны сетны «йӧзӧс югдӧдан обществолы». Ӧні важ рӧштво лун кежлӧ лӧсьӧдчӧны сувтӧдны кутшӧмкӧ ворсанторъяс.

Кружок литература босьталӧ Сыктывдінкарса Центральнӧй библиотекаысь. Виччысьӧны литературасӧ Обполитпросветысь лыддьысян керкаӧ. Лыддьысян керка воссьӧ выль восянь. Газет судзӧдӧны сӧмын на «Югыд туй». Мырсьӧны, чукӧртӧны сьӧм ас костын мукӧд газетъяс вылӧ. Том ёртъяс, мунӧ веськыда, чорыда асланыд выль заводитӧм туйӧд.

Кӧтшпомса шефъяслы колӧ отсавны кружоклы.

Сэсся Кӧтшпомын абу на комсомол ячейка. Сійӧ эськӧ зэв колантор. Педтехникумса комсомол ячейка, босьтчыв тайӧ уджӧ.