КОНША СИКТЫН

(Мордінса вӧлӧсьт, Кулӧмдін уездын)

Любӧ видзӧдны бура олӧм вылас!

Сиктыс кӧть ичӧтик (48 керка), олӧмыс мунӧ зэв бура. Любӧ видзӧдныс ӧтсӧгласа йӧз олӧм вылас! Зэв тшӧкыда найӧ чукӧртчывлӧны собранньӧяс вылӧ, сёрнитӧны ассьыныс олӧмсӧ бурмӧдӧм йылысь и мукӧдтор йылысь. Сельскокӧзяйственнӧй налог первой срок кежлас мынтӧмаӧсь пӧшти ставсӧ нин. Кольӧма сӧмын морт 3−4 медгӧлиникъясыс, кодъяслӧн мынтытӧм коли нажӧтка абутӧмла.

Кооператив уджалӧ бура.

Сиктас эм ӧтувъя лавка (кооператив). Сійӧ уджавныс неважӧн на эськӧ заводитіс да (юль 27 лунӧ), аслас бура уджалӧмӧн кужӧма нин чукӧртны сизимдас (70) шленӧс. Арнас шленъясыс асланыс вӧрысь дон босьттӧг стрӧитісны лавка, ӧні сэні нин вузасьӧны. Тӧварыс зэв донтӧм, ставыс колан тӧвар, ӧні сӧмын нажӧткатӧм вӧсна озджык вермыны босьтасьныс-а, прӧмысыд сэсся таво эз жӧ вӧв дай.

Ӧні правленньӧыс организуйтӧ кооперативнӧй кружок-курс. Виччысьӧны Обсоюзсянь колан нигаяссӧ. Гижсьӧмаӧсь кружокас 12 морт.

Велӧдчӧм. Выль школа асьныс стрӧитӧны.

Эм и школа, став челядя йӧзыс велӧдӧны челядьнысӧ, велӧдтӧмыд зэв шоч. (Кодъяслӧн нин некыдзи гортсӧ челядьтӧгыс оз позь эновтны). Школаыс крестьянскӧй керкаын, зэв ичӧт дай пемыд. Сы вӧсна ӧти чукӧртчылӧм вылын крестьянаыс шуисны стрӧитны выль школа. Керсӧ 800-ӧс Облесотдел сетӧма нин прӧста, дон босьттӧг; таво тӧвнас кӧсйӧны ваявны. Виччысьӧны толькӧ билет. Тшупныс да лэптыныс асьныс жӧ кӧсйӧны ньӧти дон босьттӧг. Йӧзӧс велӧдан отделсянь виччысьӧны толькӧ отсӧг — мастерсӧ медавны, стеклӧ ньӧбны да, кӧрт да мукӧд колантор босьтӧм вылӧ.

Выль школасӧ стрӧитігӧн сэтчӧ жӧ кӧсйӧны вӧчны торъя вежӧсъяс лыддьысян керка улӧ да спектакъяс вӧчанін. Лыддьысьныс да спектаксӧ видзӧдныс йӧзыс зэв окочӧсь. Сійӧ уджсӧ нуӧдӧ культурно-просветительнӧй кружок. Кружокыс лэдзӧ вӧлі стенӧ ӧшӧдан газет «Асъя Кыа». Бӧръявылыс учительсӧ вежисны да, газетыд дугдіс петӧмсьыс. Лӧнявны кутісны и спектакъяссьыд. Уполитпросветлы колӧ отсавны сійӧ бур уджсӧ бурджыка сувтӧдны, сідзжӧ и учительыслы колӧ ёнджыка отсавны том йӧзыслы. Том йӧзыс ӧні организуйтчӧмаӧсь союз молодёжӧ. Гижсьӧмаӧсь 10 морт. Укоммоллы колӧ первой пӧраяс кежлас ыстыны налы бур велӧдысьӧс.

Пӧжарнӧй дружина колӧ бӧр кыпӧдны.

Коркӧ организуйтчылӧма вӧльнӧй пӧжарнӧй дружина, гижсьылӧма сэтчӧ 11 морт, да уджыс сэні некутшӧм ӧні оз мун. Колӧ эськӧ Коншасалы кыпӧдны кок йылас узянінсьыс, медым и сійӧ оз кольччы мукӧд организацияясысь.

Колӧны книгаяс, газетъяс, журналъяс.

Сэсся кутшӧмкӧ Сыктывдінкарса учрежденньӧлы либӧ организациялы колӧ босьтны шефство тайӧ ичӧтик сикт вылас да ыстыны сэтчӧ книгаяс, газетъяс да журналъяс. Ӧні сэтчӧ локтӧ толькӧ: «Югыд Туй» — школаӧ да лавкаӧ — да «Крестьянскӧй газета».

Отсалӧй Коншаса войтырлы петны югыдланьыс, найӧ корсьӧны югыдсӧ!