СЕЛЬСКОКӦЗЯЙСТВЕННӦЙ ВЫСТАВКА СЁСЬКАЫН

(Емдін уездын)

Таво ноябр тӧлысьын Сёськаын вӧлі сельскокӧзяйственнӧй выставка. Выставка муніс бура. Крестьяна выставка вӧчӧм вылӧ видзӧдлісны зэв бура, ваявлісны сэтчӧ ассьыныс лӧсьӧдалӧмторъяссӧ. Быд организация дай школаын велӧдысьяс отсасисны выставка лӧсьӧдӧм вылын. ЕПО сетіс выставка вылӧ ӧти плуг.

Выставка вылын вӧліны скӧтъяс. Ставыс вӧлі 393 юр: 284 мӧс, 5 ӧш, 6 кукань, 89 вӧв, 9 порсь.

Му уджалӧм отделенньӧын вӧлі 30 экспонат^экспонат — выставка вылӧ вайӧм кӧлуй/^. Бурджыкъясыс на пиысь вӧліны бобӧнянь да шабді, сэсся вӧліны уна пӧлӧс му уджалан машинаяс.

Выставка вылӧ вайлӧм кӧлуйысь сеталісны премияяс. Став премияыс вӧлі 133. На пиысь 124-сӧ сетісны скӧтъясысь. Премияяс вӧліны 8 шайтӧдз дай улӧджык.

Рытнас пуктісны спектак. Сэні вӧліны докладъяс му уджалӧм йылысь. Крестьяналы зэв воис сьӧлӧм выланыс выставкаыд. Шуӧны: медым пӧ татшӧм выставкаясыс лоасны водзӧ кежлӧ. Выставка вылын пӧ верман аддзыны бурторъяс, позьӧ пӧ велӧдчыны, кыдзи колӧ пуктыны бурджыка му уджалӧм.

Педь Ӧльӧш.