***

В. КОРОВИНЛЫ. Чупрово (Удораын). Тэ, зон, миянӧс эн ылӧдлы. Шуан: коми газеттӧ пӧ ог вермы лыддьыны дай ог гӧгӧрво. Ме татчӧс морт. Волі Удораад Коптюгӧдз. Менӧ быдлаын вӧлі гӧгӧрвоӧны, ме сідзи жӧ. Тайӧ номерын печатайтӧма Изьваысь юӧр, лыддьы — гӧгӧрвоан он. Найӧ тэ моз жӧ шуӧны, огӧ пӧ гӧгӧрвоӧ нинӧм коми газетысь, а ми татчӧс йӧз мыйлакӧ гӧгӧрвоам быдлаысь коми кыв. Мыйла нӧ тадзи? Ми коми кыв кутчысям бурмӧдны сьӧлӧмсянь да велӧдны газетӧн пемыд коми йӧзӧс выль ног овны, долыдлун корсьны, ті неуна велалӧмныд и онӧ тӧждысьӧ пемыд йӧзӧс ас гӧгӧрвоана кывйӧн югдӧдӧм понда. Ми ногысь, колӧ ёнджыка лыддьыны коми газет. Шыпасъяссӧ (букваяссӧ) позьӧ тӧдмавны школаын. Ас кывъяд лыддьыны и гижны велалан кык-куим лунӧн, сӧмын колӧ кутчысьны сьӧлӧмсянь. Юӧръястӧ миянлы гиж кыдз кужан.

ГРИВА. ПРИВДА ВАСЬКАЛЫ. «Колӧ тӧждысьны» статьяыд газетын оз мун. Тэ гижан сійӧ жӧ, мый ми гижлім «Газетӧ гижысьяслы» статьяын. Коми сёрниыд быдлаын ӧткодь, сӧмын ӧткымын кывъяс абу ӧткодьӧсь. Ми газетӧ гижам Сыктывдінкарса гӧгӧр йӧз сёрнитан кывйӧн. «Шаньгитӧ маж, маж да на чукӧрто клади» шуӧм тэ коми сёрниӧн шуан. Сійӧ ӧд абу ни коми ног, ни роч ног.

СЫКТЫВДІНКАР. ВЕЖӦРА ЁРТЛЫ. «Лыддьысян керкатӧг пемыд бырӧдны ог вермӧй» гижӧдад кык кыв гижӧмыд лыддьысян керка восьтӧм йылысь, сэсся друг бергӧдӧмыд Клавдей поп вылӧ — сійӧ пӧ турун ӧктыны чиганъяс моз петӧма. Кодсӧкӧ ӧтиторсӧ нин колӧ гижны, мыйла шыбласян. Поплы турун сетӧмысь, дерт, нинӧм. Сёрнит сы йылысь йӧзкӧд, гижӧдыд газетын оз мун.

ПОЛЯРНӦЙЛЫ, ЗӦВСЬӦРТ (ЕМДІН У.) Тэ, ёрт, комиӧн гижан бура. Тіян сёрни торъялӧ миянысь сӧмын неуна кывйӧн. Став коми йӧзыс кӧ кутас лыддьыны ас кывъя газет, сэки оз лоны сэтшӧм дивӧясыд, кутшӧм вӧлӧма тэнад Удораса анькӧд.

Гиж водзӧ.

ВИЗЯБӦЖ. ГАЗЕТӦ ГИЖЫСЬЛЫ. Гижан — йӧз пӧ шуасьӧны Епо восьтӧм йылысь да оз восьтыны. Епо восьтӧмыд ӧд ас саяныд. Босьтчӧй дай восьтӧй. Обсоюз, дерт, восьтынытӧ отсалас, индас туй.

ИЗКАРСАЛЫ. Кӧдзвыв вӧлӧсьт. «Горком РКП(б), кывзы» статьятӧ ыстім Горком РКП(б)-лы.

ВЫЛЬГОРТ. КОМИ ВОКЛЫ. Религия йывсьыд газетын оз мун.

Выльтор нинӧм он висьтав.

Н. С.-лы. СЫКТЫВДІНКАР. «Выль семья ордын» статьяыд сёрмис. Редакция тэнӧ корӧ тшӧкыдджыка гижны газетӧ.

СЫКТЫВДІНКАР. ТӦЖДЫСЬЫСЬ МОРТЛЫ. Вапӧлкаса кулакыдлысь гиж ним-овсӧ да выль пӧв гиж, код ногӧнджык уджӧдӧ аслыс гӧль крестьянаӧс. Сэки лэдзам газетын.

ДЕРЕВНЯЫН ВЕЛӦДЫСЬЛЫ (Кулӧмдін у.) Нигаяс да жалӧванньӧ велӧдысьяслы ыстытӧм йылысь гижӧдтӧ ыстім Обласьтса йӧзӧс велӧдан юкӧдӧ да корим сы вылӧ воча юӧр газетӧ сюйны.

ВИЗЯБӦЖ, АДДЗЫЛЫСЬЛЫ. Конвой йывсьыд гижӧдын тэ абу пасйӧмыд налысь ним-овнысӧ. Ті, тыдалӧ, асьныд абу тӧдӧмныд зычитысь йӧзтӧ, колӧкӧ, конвойнӧйяс пыдди дурисны мукӧд йӧз. Водзӧ колӧ гӧгӧр тӧдмавны да вӧлисти гижны. Кыв-кыв серти да помӧдз тӧдмавтӧг гижӧмнад тэныд дай редакциялы оз ло лӧсьыд, оз кӧ збыльмы. Газетӧ огӧ сюйӧ.