ПОП АЛИ ПӦЖАРНӦЙ МАШИНА, КОДЫС КОЛӦДЖЫК?

Миян крестьяна Кедвавомскӧй вӧлӧсьтын (Изьваын) и сідзжӧ деревняясын олӧны пыр на важ ногӧн, кыдз и важӧн сар дырйи, эз старайчывны школаяс помлась, а ӧні миян пыр на сідз олӧны сы цельӧн. Оз на тӧдны делӧяс сӧветскӧй власьтлысь школаяс помлась. Вот напр.: миян эз вӧв поп, но крестьяна миян вайӧдісны попӧс, и сійӧс содержитӧны ас вывсьыныс: пескӧн, турунӧн, няньӧн и мукӧдторйӧн — кодысь пӧльза нинӧм абу. Эг на кылӧ, што кодкӧ, гашкӧ, горӧдчыліс, што миян колӧ учитель да сійӧ поддержитны, а сы вылӧ юрнысӧ оз кыпӧдлыны. Вот миян крестьяна мыйтӧм думайтӧ. И сідзжӧ вӧлӧсьтын абу кузнеча ни нинӧм. Менам предложенньӧ сэтшӧм, мый содержитны попӧс — лучшӧ сійӧ пай сложитчыны да кыськӧ ньӧбны пӧжарнӧй машина или жӧ кыськӧ вайӧдны кузнеч да сылы мынтыны — сэсь пӧльза унджык. Вот нӧшта пример: Картаёль сиктын во 6−7 абу школа, и нисколько оз думыштлыны, што миян колӧ учитель или мукӧд сэтшӧм предмет, а попӧс пыр содержитӧны, дивъя попъясыдлы овны. Этатшӧм пемыд народ костад пыр мыйкӧ кыськӧ сюрӧ прӧмыс.

Кедвавомса.

РЕДАКЦИЯСЯНЬ. Тайӧ юӧрсӧ «Кедвавомсалысь» сюйим газетӧ ЛӦСЬӦДЛЫТӦГ, мед быд Коми му пельӧсын лыддясны да шуасны — ёна-ӧ торъялӧ изьваса кыв литературнӧй коми кывйысь. Ми ногӧн, тані эм сӧмын тӧдтӧмджык куим кыв: помлась (ми ног — понда), горетсыліс — горӧдліс, нӧшта — ещӧ. Мукӧд кывъясыс торъялӧны неуна, ми ногӧн, позьӧ гӧгӧрвоны ставсӧ. Та мындатӧ роч кыв тожӧ торъялӧ. Босьтӧ кӧть кутшӧм губерня, крестьяна пӧвстын сёрнитан кыв, быдлаын аслыснога.