КОЛӦ, ДА УДЖАВНЫ НИНӦМӦН

Шойнатыын (Кулӧмдін уездын) мӧда-мӧдлы отсасян комитет ньӧти оз уджав. Сьӧмыс весиг ӧти ур абу. Гӧль йӧзлы эськӧ комитетыд зэв колӧ. Эмӧсь сёысь уна вӧвтӧм крестьянаяс. Налы торъя нин ёна колӧ комитетыд. Бура олысь йӧз шуасьӧны: нинӧм пӧ комитетсьыс. Налытӧ, дерт, нинӧм ӧні кежлӧ, кытчӧдз... пикӧ оз воны. Ӧні профсоюзса шленъяс — кер дінын уджалысьяс — шуисны мӧда-мӧдлы отсасян комитетлы сетны 1% нажӧткасьыныс. Сы ногӧн жӧ колӧ вӧчны мукӧд йӧзлы. Мӧда-мӧдлы отсасян комитетлысь уджсӧ колӧ лэптыны, колӧ чукӧртны унджык сьӧм.

Пинь.