КРЕСТЬЯНА КОНФЕРЕНЦИЯ СЁСЬКАЫН

(Сыктыв уездын)

Конференция муніс декабрын 14‐ӧд лунӧ. Сы вылын вӧліны 41 делегат. Вӧчисны докладъяс СССР олӧм да удж нуӧдӧм йылысь, Мопр йылысь, йӧзӧс велӧдӧм йылысь, мӧда-мӧдлы отсасян комитет йылысь, кооперация йылысь. Медбӧрын висьталісны Волисполкомса удж нуӧдӧм йылысь.

СССР олӧм да удж нуӧдӧм йылысь сёрнитӧм бӧрти конференция шуис: Сӧвет власьт пӧ ӧні ёнмис, бурмӧдіс олӧм рабочӧйлысь да крестьяналысь. Медым водзӧ кежлӧ ӧдйӧнджык кыптас промышленносьт да му-видз уджалӧм, колӧ срок кежлӧ мынтыны налог. Мопр йылысь сёрнитӧм мысти конференция шуис отсавны быдӧнлы, коді мыйӧн вермас, капиталист тюрмаясын пукалысьяс революционеръяслы, тшӧктӧ найӧс капиталистъяслы лэдзны тюрмаясысь. Сӧвет власьт кӧ пӧ чукӧстас, ми ӧтвылысь ставным сувтам уджалысь йӧзӧс дорйӧм вылӧ.

Йӧзӧс велӧдӧм кузя делегатъяс шуисны: колӧ пӧ мӧд восянь восьтыны ещӧ школа Якӧтш сиктӧ. Лыддьысьны-гижны кужтӧм йӧзӧс комын арӧсӧдз колӧ велӧдны мырдӧн. Коми кывйӧн школаясын пӧ велӧдны медводдза кык восӧ, сэсся позьӧ рочӧн. Карса школаясӧ велӧдчысьясӧс колӧ босьтавны быд вӧлӧсьтысь йӧзыс лыд серти (пропорционально). Купеч да поп пиянӧс тайӧ лыдас оз ков сюйны. Школаясын ёна колӧ велӧдчан кӧлуй: книгаяс, бумагаяс, мукӧдтор.

Мӧда-мӧдлы отсасян комитет йылысь конференция шуис: кодъяс пӧ эз на гӧгӧрвоны да оз кӧсйыны гӧгӧрвоны бурлунсӧ комитетлысь, найӧс колӧ тшӧктыны мырдӧн пырны комитетас. Мӧда-мӧд отсасян комитетъяслысь удж колӧ ёнмӧдны, ӧдйӧнджык сувтӧдны кок йылӧ. Лӧсьӧдісны комитетлы сетны дас урӧн быд вӧлысь дай мӧскысь. Конференция вылас жӧ комитетӧ пырисны 24 морт.

Кооперациялысь уджсӧ конференция шуис шӧркоддьӧмӧн. Колӧ пӧ пырны кооперативӧ став гражданалы. Ӧні сэні 111 морт. Сёськаса Епо отсалӧ йӧзлы тӧвар уджӧн сеталӧмӧн. Сӧмын ӧні Епоыс ачыс уджйӧза 1000 шайт. Сы понда сьӧкыд водзӧ бура удж нуӧдны. Прибыльсьыс мыйкӧ мында Епо торйӧдӧма сьӧм отсӧг вылӧ мӧда-мӧдлы отсасян комитет моз Епоса шленъяслы.

Волисполкомса удж нуӧдӧм йылысь конференция шуис корны: 1) лӧсьӧдны вӧлӧсьтын пельшӧрӧс; сійӧ локтӧдз кутшӧмкӧ лунъясӧ корлывлыны пельшӧрӧс Нювчим заводысь; 2) чинтыны страхӧвӧй вот скӧтысь джын мындаыс, а оз кӧ позь, лӧсьӧдны страхуйтӧмсӧ йӧзлы ас вӧляысь; 3) мездыны, не тшӧктыны йӧзӧс весавны вӧр дон босьттӧг дас кер сетӧмысь; 4) му-видз лӧсьӧдан удж нуӧданінлысь корны ыстывлыны вӧлӧсьтӧ агрономӧс, медым сійӧ висьтавлас, кыдзи выль ногӧн колӧ уджавны му; 5) Обисполкомӧ шыасьлыны, медым сійӧ корас Центрлысь Коми муӧ кӧрт туй лӧсьӧдны.

Крестьяна конференция вылын зэв бура да ёна сёрнитісны став удж нуӧдӧм йывсьыс.

А. Канов.