БИТӦГ ТШЫН ОЗ ОВЛЫ

Англияса профсоюзлӧн делегацияыс Англияӧ воӧм мысти ёна ошкӧ СССР-ын олӧм-вылӧм да уджалӧм. Овмӧс пӧ сэні ӧдйӧ бурмӧ, паськалӧ. Пабрик-заводын уджъяс мунӧны бура. Уджалысьяс ӧтув ёна олӧны. Удж налысь кокньӧдӧмаӧсь, олӧм бурмӧдӧмаӧсь. Тадзи жӧ англияса профсоюзлӧн делегацияыс шуаліс СССР-са рабочӧй йӧзлы на пиын ветлігӧн, налысь уджсӧ видлалігӧн. Налысь шуӧмъяснысӧ печатайтлывлісны газетӧ СССР-ын дай мукӧд государствоын. Сӧмын налысь гижӧдсӧ врагъясыд миян гугӧн бергӧдлісны, дзик мӧдарӧ. Шулісны: весь пӧ ошкӧны, леститчӧм кузя сӧмын пӧ. Газетад пӧ ӧд омӧльтӧ он лэдз, абу лӧсьыд; гӧсьтъяслы пӧ ӧд (гӧсьтъяснас капиталистъяс шуӧны англияса профсоюзлысь делегациясӧ — СССР-са гӧсьтъясӧн) вӧйпсьыны абу лӧсьыд.

Битӧг тшын оз овлы. Сідз жӧ и тані. Абу кӧ ошкана олӧмыд, этша нин бокӧвӧй йӧзыд ошкасны. Тайӧ делегация шуӧмъяссӧ колӧ тӧдны му пасьта эмбуртӧм йӧзлы. Тӧдны сы вӧсна, мый меньшевикъяс ылӧдлӧны найӧс, шуӧны: энӧ пӧ колӧкӧ мырддьӧ власьтнытӧ-а — вошад. Налы воча англияса профсоюзса делегация аслас СССР-ын олӧм ошкӧмӧн шуӧ: абу пӧ сідзи, абу тіян ног. Ӧтувтчӧм республикаясын власьтыс уджалысь да крестьяна киын, олӧм налӧн мунӧ водзӧ зэв ӧдйӧ. Мед жӧ та йылысь тӧдасны уджалысьяс став му пасьтаын, ёнджыка заводитасны босьтны вермасьӧмӧн ас киӧ власьтсӧ. Капиталистъяслы СССР-ын олӧм ошкӧм, дерт, зэв абу муса, зэв ковтӧмтор. Англияса делегация асланыс докладӧн СССР-ын олӧм йылысь кыдз быттьӧ тшӧктӧны видзчысьны капиталистъяслы: Сӧвет Республикаясын пӧ уджалысьяс зэв кужӧны ӧтувтчавны да ас киӧн бура овмӧс кыпӧдны. Делегация аслас шуӧмнас петкӧдлӧ: «Кӧть кыдзи ті, капиталистъяс, эн мырсьӧй, уджалысьяслысь Октябрса революцияӧн перйӧмтор онӧ вермӧй мырддьыны».

Пондам надейтчыны, англияса делегациялӧн шыӧдчӧм оз весь вош, йиджас кодсюрӧлы сьӧлӧмӧдзыс.

Ростаысь.