***

ДОМАШКИНЛЫ. ВИЗИНӦ. Тэнӧ редакцияын абу на пасйӧма газетӧ гижысьӧн, сы понда тэнад быд гижӧдторйысь пошта перйӧ миянлысь 14 урӧн. Гижӧмыд ёна тэрмасьӧмӧн, сьӧкыда гӧгӧрвоам. Кӧсйысян кӧ водзӧ гижны — юӧрт редакциялы ассьыд адрестӧ, кытӧн уджалан, партийнӧй абу.

ПИЛЯ ИВАНЛЫ. ЛӦЗЫМӦ. Гижӧдтӧ печатайтам, сӧмын зэв кузя гижӧмыд да лои чинталыштны. Водзӧ гиж дженьыдджыка. Комиӧн зэв лӧсьыда гижан, виччысям выль юӧръяс.

КРУКЛЫ. ПАДЖГАӦ. Кутшӧм гижӧдъяс миянӧдз волӧны — сюям газетӧ, огӧ кӧ сюйӧ — гижам юӧр пошта кудйын. Ӧнія гижӧдъястӧ лэдзам кыкнансӧ.

МАРТЮШОВЛЫ, ПОЖӦГӦ. Бурджыктор ӧмӧй дзонь вӧлӧсьтад абу нин? Мысса «бурсьылысьяс» йывсьыд нинӧм и тыртны газеттӧ. Водзӧ гижышт вӧлӧсьтса олӧм йылысь.

КӦРТКЕРӦС. П.С.П.-ЛЫ. «Комсомол» гижӧдыд абу стихотворенньӧ кодь. Тэ кывъяссӧ корсьӧмӧн корсьӧмыд, сэсся нинӧм абу и артмӧма. Ӧти кывсӧ гижӧмыд комиӧн дай рочӧн:

Овлӧ СЁРНИ-РАЗГОВОР,

Дерт нин, абу омӧльтор.

Бура стихотворенньӧястӧ гижны дыр на лоӧ велӧдчыны. Гиж прӧстӧ статьяяс. Комиӧн тэ бура гижан.

ВАРЫШЛЫ, ГАРЪЯ. Тэныд, зонмӧ, варыш нимыд зэв мунӧ. «Борда варыш» уджалӧ гусьӧникӧн, тэ, «кывъя варыш», кӧсъян сідзи жӧ. Вай висьтав ассьыд ним-овтӧ, сэки сюям газетӧ. Збыльторйысь некор эн пов.

КУНИБ. З. Старцевлы. Газет кутам ыстыны. Гиж тшӧкыдджыка. Виччысям висьтъяс газетса коми литература пельӧсӧ лэдзӧм вылӧ.