ШУАСЬӦМ ДОРЫСЬ УДЖАВНЫ БОСЬТЧӦЙ — БУРДЖЫК ЛОӦ
Ми, коми йӧз, унаӧн на огӧ кужӧй овны. Сы понда оз кыпты миян овмӧс.
Ми пыр шуасям, норасям ыджыд налогысь, асьным, артавны кӧ лючки, не сымда видзамӧй мукӧдлаӧ, ковтӧминӧ: поп-дяклы асьнымӧс жӧ ылӧдлӧм да бӧбйӧдлӧм вылӧ, кода сур вылӧ да самӧкур вылӧ. Эмӧсь уна вермана йӧз — налогтӧ срок кежлӧ оз мынтыны, пыр нюжӧдчӧны, оз тӧдны, мыйта сы помысь лоӧ омӧльтор Сӧвет власьтлы.
Сэсся бура тӧдтӧг пыр шуасям Исполкомса служащӧйяс вылӧ омӧля удж нуӧдӧмысь. Асьным, кӧть сёысь корасны, огӧ мунӧй скод вылад, огӧй видзӧдлывлӧй, мый Исполкомын вӧчӧны, мый колӧ вӧчны.
Сідз жӧ пыр норасям омӧля турун-нянь артмӧмысь. Асьным бара жӧ огӧ кывзӧй, огӧ керӧй, кыдзи бур йӧз тшӧктӧны, велӧдӧны уджавны видз-мунымӧс, мед бурджыка артмис няньяс, турунъяс, град выв пуктасъяс. Муяс вылӧ турунъяс огӧ кӧдзӧй, видз вывъясысь туруныд чукӧрмӧ этша. Унджык скӧт видзны ог вермӧй, куйӧд оз тырмы. Муыд эськӧ тырыс эм да, дӧзьӧритам омӧля. Васӧдінъяс огӧ косьталӧй. Сэсся ӧд, дерт, няньыд оз артмы.
Бара гӧльяслы тшӧктӧны ӧтувтчыны, видз-мутӧ уджавны ӧтвылысь. Сэтшӧмъясыслы казнаысь сетӧны отсӧг сьӧмӧн, сетӧны му уджалан кӧлуй, машинаяс ичӧтджык дон вылӧ. Ӧтвылысь уджалӧмнад, дерт эськӧ, этшаджык пӧраӧн унджык верман уджавны да, кокньыдджыка да, мыйлакӧ оз ӧтувтчыны, пыр кыскӧны важ ногыс, олӧны тшыг нисьӧ пӧт.
Ӧнія Сӧвет власьтлӧн быд вӧлӧсьтын лӧсьӧдалӧма мӧда-мӧдлы отсасян комитетъяс. Сійӧ эськӧ зэв колантор, он ӧд тӧд, кӧзяйствоад лоас кутшӧмкӧ ыджыд пакӧсьт, сэсся отсалысьыд некод абу. Ми асьным сылысь бурсӧ огӧ кӧсйӧ тӧдны, огӧ чӧжӧй сэтчӧ сьӧм ни мукӧдтор. Быд во кӧ эськӧ чукӧртамӧй кӧть этшаникӧн, дыр мысти тырыс чукӧрмас, уна верман отсавны пикӧ воӧм йӧзлы. Этшаник чукӧртӧмнад он гӧльмы.
Бара лӧсьӧдӧма кооперативъяс. Колӧ эськӧ сы бердӧ быдӧнлы чорыда кутчысьны да ёнджыка вынмӧдны, мед унджык вермас тӧварсӧ вайны, бурджыкӧс, да донтӧмджыка вузавны аслыным жӧ. Ми пыр на ас ног вӧчам: быдӧн шленӧ огӧ пырӧй, ас вӧчӧм тӧвар вузалам бокӧ, спекулянтъяслы, сэсся налысь жӧ бӧр ньӧбам донӧнджык дай кутшӧмсюрӧ тӧвар, вынсьӧдам найӧс. Ассьыным кооперативнымӧс гӧльмӧдам. Сійӧ миян вывті бӧра удж.
Кад миянлы дугдыны сэтшӧм весьшӧрӧ зыньгӧмсьыс да норасьӧмсьыс. Бурджык сы дорысь кывзыны велӧдӧмсӧ, индалӧмсӧ Сӧвет власьтлысь да керны, овны велӧдӧм сертиыс. Зыньгӧмыд миянлы ньӧти оз отсав. Колӧ чорыда кутчысьны, босьтчыны кыпӧдны, вынмӧдны ассьыным олӧмнымӧс.
Ас морт.
