АС КЫВЙӦН КОКНИДЖЫК

Уналаысь кывсьывлӧ коми йӧзлӧн шуасьӧм ас кывйӧн школаясын велӧдӧм вылӧ. Шуӧны: коми кывтӧ пӧ ми зэв лӧсьыда тӧдам школаын велӧдчытӧг, мый пӧ «сюра мегӧястӧ» велӧдӧмысь.

Ме дзик коми морт. Важ том дырйи школаӧ ӧнія челядь моз жӧ котравлі. Сӧмын лои велӧдчыны важ моз, рочӧн. Сизим арӧс тырӧм бӧрын муні школаӧ. Нинӧм вӧлі ог тӧд рочӧн, некымын молитваысь ӧтдор. Молитва кывъяссӧ вӧлі кужа шуавны, сӧмын ачым ни, мам-батьӧй ни оз вӧлі тӧдны, мый лоӧ сійӧ кывъясыс. Мед сэсся кӧть пеж кывъяс. Школаын велӧдысь вӧлі Сыктывдінкарса «роч», оз вӧлі шу весиг ӧти коми кыв, яндзим буракӧ вӧлі... Недыр мысти тӧдмалі шыпасъяс, велалі лыддьысьны. Сӧмын велалі лыддьысьны синмӧн, мый вӧлі лыддя, ачым ог тӧд. Бать-мам менам лыддьысьӧм вылӧ зэв радлӧны: со пӧ ӧд кутшӧм лӧсьыда тӧдӧ рочнас миян пиыд. Регыд пӧ и велалі.

Кык во велӧдчӧм бӧрын ме сюся куті лыддьыны быдторсӧ. Сӧмын лыддьӧм бӧрас ог вӧлі куж висьтавны, омӧля гӧгӧрвоан да мый лыдди. Синмӧн лыддя, паметь вылӧ вӧлі кольӧ, а юр вежӧр оз паськӧд. Некыдз вӧлі ог вермы комиӧн висьтавны роч книгаысь лыддьӧмтор. Висьталасны вӧлі рочӧн кутшӧмкӧ мойд, зэв эськӧ думнад кывза сьӧлӧмысь да, некыдз ог вӧлі вермы висьтавны ас кывйӧн; кывла кӧ коми мойд — ставсӧ гӧгӧрвоа да висьтала кӧть во бӧрын. Со ӧд кутшӧм кокниа пырӧ юр вежӧрад ас кывйыд. Юр вежӧр кӧ паськалӧ, да кужны кӧ кутан ас кывйӧн бура гӧгӧр мӧвпавны, сэки немтор повны мукӧд пӧлӧс кыв тӧдтӧмысь. Кывтӧ тӧдмавны абу ёна сьӧкыд, юр вежӧртӧ паськӧдны сӧмын колӧ — сійӧ медся сьӧкыд.

Коми йӧз! Сӧмын ас кывйӧн ми вермам кусӧдны ассьыным пемыдлун. Коми мортлы бура юр вежӧрӧ пырӧ сӧмын коми кыв.

П.