ПЕМЫДЛУН БЫРӦДАН УДЖ КОМИ МУЫН

Выльгортын (Визин у.)

Крестьяналӧн конференция да вӧлӧсьтувса съезд велӧдчӧм йылысь шуисны: медводдза кык восӧ велӧдны дзик коми кывйӧн. Посни челядьӧс велӧдны колӧ мырдӧн нёль во. Гырысьясӧс велӧдны шуисны мырдӧн жӧ, мед дас во революция тыригкежлӧ оз коль ни ӧти пемыд морт вӧлӧсьтын.

Шойнатыын (Кулӧмд. у.)

Гырысь йӧзӧс велӧдӧм мунӧ омӧля. Гижсьӧмаӧсь 20 морт, волывлӧны сӧмын дасыс. Ӧти лун воласны ӧти пӧлӧс йӧз, мӧд лун мӧд пӧлӧс. Велӧдысь омӧля удж мунӧмысь абу мыжа.

Пинь.

Гриваын (Визин у.)

Гырысь йӧзӧс велӧдӧм мунӧ бура. Волывлӧны морт кызь кымын. Допризывникъяс пытшкысь сӧмын коли велӧдчытӧм кык морт асланыс ыръянитчӧм понда. Волисполком найӧс сетліс велӧдчытӧмысь судӧ. Декабр 12 лунӧ вӧлі на вылын суд. Судитісны мырдӧн прӧста уджӧдны дай велӧдчыны.

Привда Васька.

Мылдін (Печӧраын)

Вӧлӧсьтын йӧзӧс велӧдан удж век кыссис бӧрын. Дзонь вӧлӧсьтын (300 верст пасьта) сӧмын ӧти школа. Гырысьджык школаясӧдз 384 верст. Эм нардом, библиотека да лыддьысян керка. Библиотекаын унджык книгаыс кутшӧмкӧ отчётъяс, колӧны сӧмын кооперативъяслы да сюсь юр вежӧра йӧзлы. Омӧлика велӧдчӧм йӧзыдлы татшӧм книгаяссьыд нинӧм. Газет волӧ гежӧда.

Селькор.

Помӧсдін (Кулӧмд. у.)

Ноябр 23 лунӧ Помӧсдінса нывбаба шуисны велӧдчыны. Ас костсьыныс бӧрйисны 27 делегаткаӧс.

Мед бара оз жӧ коль сӧмын шуӧмыс, Помӧсдінса аньяс, энӧ жӧ бара вунӧдӧ.