КОЛӦ-Ӧ ЮГЫДЛУН?
Сӧвет власьт зэв ёна тӧждысьӧ пемыд йӧзӧс велӧдӧм вӧсна. Восьталӧ, мый вермӧ, мый судзсьӧ выныс да сьӧмыс, школаяс челядьлы, верстьӧ йӧзлы. Мыйла колӧ уджалысь йӧзлы велӧдчӧм, югыдлун?
Кымын пемыд йӧз, сымын омӧль олӧм. Миянлы, рабочӧй да крестьяналы, бур кокни олӧм сьӧкыда шедӧ асланым пемыдлун вӧсна. Пемыд йӧзӧн миянлы ёна-ёна сьӧкыд воны бур олӧмлань, кодӧс ми ас киӧн дорам. Югыд вежӧра, гӧгӧрвоысь йӧзӧн ми кокниджыка сэтчӧ воам. Вежӧра, югыд йӧзӧн вермам лоны сӧмын велӧдчӧмӧн. Сідзкӧ, колӧ велӧдчӧмыд, югыдлуныд.
Сӧвет власьт — уджалысь йӧзлӧн власьт. Уджалысь йӧз асьныс нуӧдӧны став уджсӧ государствоын. Ӧні быд уджалысь мортӧс вермасны бӧрйыны Сӧветъясӧ. Кыдзи нӧ велӧдчытӧм морт вермас бӧрйыны дай бӧрйыссьыны Сӧветъясӧ? Колӧ вежӧра, сюсь, бура велӧдчӧм морт та вылӧ.
Миян овмӧс омӧль на, ми гӧльӧсь на. Ми уна на вын шыбитам весьшӧрӧ, ми уджалам-пессям ныр вылӧ усьтӧдз, сӧмын ассьыным кынӧмпӧт вердны муртсапырысь вермам. Мый вӧсна? Велӧдчытӧмнымла. Сӧмын велӧдчытӧмнымла!
Ми корсям ассьыным овмӧс кыпӧдны веськыдджык туй, зілям этшаджык вынӧн унджыктор босьтны. Му-видз уджалӧмнымӧс миян колӧ бурмӧдны. Вермам ставсӧ сійӧс вӧчны велӧдчӧм йӧз индалӧм серти. Медым ми вермам гӧгӧрвоны велӧдчӧм йӧзӧс, медым миянлы позис лыддьыны налысь гижӧм книгаяс, колӧ велӧдчыны. Овмӧс кыпӧдны вермам сӧмын велӧдчӧмӧн.
Медым ми вермам морт ногӧн овмӧдчыны, колӧ унатор тӧдмавны. Тӧдмавны унджык вермам ми сӧмын мӧда-мӧдкӧд ӧтвылысь вежӧртӧмӧн, сӧмын мӧда-мӧдлысь, медся ёна велӧдчӧм йӧзлысь, кывзӧмӧн, книгаяс лыддьӧмӧн.
Асьным ми, коми йӧз, шулам: «Ми пемыдӧсь. Кысь нин миянлы сійӧтор кужны, сійӧтор вӧчны!» Тайӧ кывъясыс сьӧлӧм вылӧ ёна воліс сардырся правительстволы. Тайӧ кывъясыс Сӧвет власьтлы парскӧ. Сылы оз ков пемыд йӧзыс, сылы колӧ вежӧра, сюсь уджалысь морт.
Кӧсъям-ӧ ми, коми йӧз, бур олӧмӧ воны, кӧсъям-ӧ ми вежӧра, гӧгӧрвоысь йӧзӧн лоны? Дерт, кӧсъям. Колӧ-ӧ югыдлун? Дерт, колӧ. Сідзкӧ, вайӧ велӧдчыны, югдӧдчыны.
Коми йӧз! Пӧрысь и, верстьӧ и, челядь и, онӧ на кӧ кужӧй лыддьысьны-гижны, мунӧй велӧдчыны школаясӧ.
