ВЕЛӦДӦМ УДЖ ДІНӦ КУТЧЫСЯМӦЙ БЫДӦН

Талунъя лунӧ вит во сайын Сӧвет власьт лэдзис йӧзӧс лыддьысьны-гижны велӧдӧм йылысь декрет. Тайӧ декретнас Сӧвет власьт шуис дай босьтчис чорыда вермасьны важ, сардырся пеж олӧмысь кольӧмӧн — пемыдлунӧн. Капиталистъяс да буржуйяс колисны миянлы 70% дзик лыддьысьны-гижны кужтӧм уджалысь йӧзӧс. Налы колӧ вӧлі пемыд йӧз, мед кокниджыка да унджык позис вирнысӧ юны, ылӧдлыны, тшыг нисьӧ пӧт видзны.

Сӧвет власьт, уджалысь йӧзлӧн власьт, дзик мӧд ногӧн тайӧ удж вылӧ видзӧдліс. Сӧвет Республикаясын колӧны став уджалысь йӧзыс велӧдчӧмӧсь, вежӧраӧсь. Сэтшӧм йӧзӧн сӧмын позяс овмӧс кыпӧдны, ёнмӧдны. Велӧдчӧм уджалысь йӧз сӧмын вермасны Сӧвет власьтлысь бура удж нуӧдны, гӧгӧрвоны сылысь уджсӧ, сӧмын сэтшӧм йӧзӧн верман выль олӧм лӧсьӧдны, кокниджыка, веськыдджык туйӧд воам социализмӧ. Миян велӧдысьным Ленин ёрт шуліс: «Пемыд йӧзӧн, велӧдчытӧм йӧзӧн выль олӧм огӧ вермӧй лӧсьӧдны».

Сӧвет власьт став ас му пасьтаыс восьталіс верстьӧ йӧзӧс велӧдан школаяс (ликпункты), лыддьысян керкаяс. Кымын ёнмӧ овмӧснас, сымын унджык восьтӧ.

Школаяс пыр став лыддьысьны-гижны кужтӧм йӧзсӧ лэдзны он на вермы. Школаяс оз на тырмыны. Йӧзӧс велӧдӧм вылӧ ёна уна колӧ вын, колӧ сьӧм. Сы вӧсна лӧсьӧдалӧма «Йӧзӧс югдӧдан Обществояс» (Об-во «Долой неграмотность»).

Кужтӧм йӧзӧс лыддьысьны-гижны велӧдӧм абу сӧмын удж куш нарошнӧ сы вылын олысь йӧзлӧн — велӧдысьяслӧн. Велӧдӧм удж нуӧдӧмӧ колӧ босьтчыны дзик быдӧнлы, быд гӧгӧрвоысь мортлы, босьтчыны пырысьтӧм-пыр, чорыда.

Коді оз на куж лыддьысьны-гижны, сьӧлӧмсянь сы вылӧ лэччывны колӧ. Лыддьысьны-гижны велӧдчӧм абу сьӧкыд, шедӧ регыдӧн. Оз ков вунӧдны — сӧмын велӧдчӧмын вын, сӧмын велӧдчӧмӧн-югдӧдчӧмӧн ми овмӧдчам, сӧмын велӧдчӧмӧн выль шуда олӧм дорны вермам.

Ленин ёрт шуліс: «Дасӧд во Октябрса революция тыран лун кежлӧ мед эз вӧв весиг ӧти лыддьысьны-гижны кужтӧм морт». Квайтӧд во вылӧ петігӧн йӧзӧс велӧдан декрет лэдзӧмсянь ещӧ зіля босьтчамӧй Ленин ёртлысь шуӧмсӧ олӧмӧ нуны.

Тайӧ лунсянь мед быд лыддьысян керкаын лоӧ йӧзӧс велӧданін.

Тайӧ лунсянь мед быд лыддьысьны-гижны кужысь морт велӧдас кужтӧмӧс.

Медым быд школа вӧлі тыр верстьӧ йӧз велӧдчысьясӧн. Нывбаба костын ёна уна велӧдчытӧм йӧзыс. Найӧс медся ёна колӧ кыскыны велӧдчыны.

Коми йӧз! Босьтчамӧй ставным ӧтвылысь чорыда, дугдывтӧг помӧдз вермасьны пемыдлункӧд. Ӧтвылысь ставным регыдджык венам!