***

СЮЗЯЫБ. ДЕДОВЛЫ. Сюзяыбса олӧм йылысь неважӧн на гижлім («Югыд Туй» № 234). Сы вӧсна тэнад статьяыд оз мун газетын.

Виччысям водзӧ тэсянь гижӧдъяс.

ДЕРЕВАННӦЙ. ПЕЛЯ МОРТЛЫ. Октябрса революция лун празднуйтӧмтӧ тэ гижӧмыд тӧлысь сайын вӧлисти. Колі ӧд ещӧ тӧлысь-мӧд нюжӧдчыны да ыстыны. Дерт, ӧні ёна нин сёрмис, газетӧ ог лэдзӧй.

ВИЗИНСА КОМСОМОЛ ЯЧЕЙКАЛЫ. Газетӧ гижысьыд, дерт, колӧ миянлы. Бӧрйӧй сійӧс да тшӧктӧй гижны.

КӦРТКЕРӦС. КИНЬЛЫ. Вочакывтӧ «Экслы» огӧ лэдзӧй. «Экс» абу омӧльтӧма тіян вӧлӧсьтлысь уджсӧ. Сӧмын пӧ колӧ бурджыка сувтӧдны. Кӧрткерӧсса олӧм йывсьыд ӧткымынлаті лэдзим газетын.

ВЫЛЬГОРТ. БУР ВЫЛӦ ВЕЛӦДЫСЬЛЫ. Тэ гӧгӧрвоан дзик мӧдарӧ. Колӧ лыддьысян керкаын газетъяс йӧзлы лыддьыныс. Колӧ велӧдны йӧзӧс сэтчӧ волывлыны. Исполком абу лыддьысян керка. Сэні сӧмын удж нуӧдӧны. Статьяыд газетын оз мун.

ГАРЪЯ. МАТРОС ПИЛЫ. Аддзӧмныд жӧ сьӧм удждысянінтӧ. Вичкоысь! Вичкоыд ӧд пыдӧстӧм мешӧк кодь. Кӧть мыйта сэтчӧ сет, тӧрас. Удждысьнытӧ, дерт, оз кут гӧль крестьяналы. Сійӧс быд морт тӧдӧ. Шыасьӧй сьӧм удждӧм йылысь мӧда-мӧд отсасян комитетаныд, бурджык лоӧ. Статьятӧ газетын лэдзӧмысь нинӧм.

ПРОНЬДОР. СІЙӦЛЫ. Статьяясыд оз мун. Тэнад роч нисьӧ коми артмӧма. Лыддяв коми нигаяс, газетъяс, медым бурджыка комиӧн велалан гижны.