СЫКТЫВДІНКАРСА РАЙОНСА ВЕЛӦДЫСЬЯСЛӦН КОНФЕРЕНЦИЯ

Сыктывдінкарын воссис конференция школаын велӧдысьяслӧн. Оботдел Всеработпросын юралысьыс конференциясӧ восьтігас висьталіс став Сӧвет Республикаса велӧдысьяслӧн съезд лоӧм йылысь, мый вӧсна сійӧ колӧ, кыдзи сэк кежлӧ лӧсьӧдчыны. Сійӧ съездыс велӧдысьясыдлӧн лоӧ медводдза Сӧвет власьт дырйи.

Обком РКП-сянь чолӧмбыттьӧ конференциялы висьталіс Буткин ёрт. Сійӧ тӧдмӧдіс съездӧс йӧз государствоса да ас муын ӧнія кадся олӧм йылысь да удж йылысь.

Буткин ёрт висьтавлӧм мысти конференция шуис чорыда нуны водзӧ Октябрса революцияӧн перйӧм олӧм, овны, уджавны Ленин ёрт велӧдӧм серти, уджавны ӧтув коммунистъяскӧд да комсомолечьяскӧд.

Чолӧмбыттьӧ кывъяс висьталісны Обпрофсоветсянь, Обкоммолсянь, пионеръяссянь, Гӧрд армиясянь да Обженотделсянь.

Конференция шуис ыстыны телеграмма Мӧскуаӧ Всеработпросса Центральнӧй Комитетлы, тшӧктіс на висьтавны чолӧмбыттьӧ став Сӧвет Республикаса велӧдысьяс съездлы коми велӧдысьяссянь.

Ыстісны телеграмма ЦК РКП-лы, тшӧктісны висьтавны чолӧмбыттьӧ Сӧвет Республикаса дай мукӧд государствоса коммунистъяслы. «Коммунист партия велӧдӧм серти уджалысьяскӧд ӧтув нуӧдам капиталистъяскӧд вермасьӧм помӧдз», — шуис конференция.