КОЛӦ ДА АБУ

Изкарса войтыр, 5-ӧд десятаысь (Кӧдзвывса вӧлӧсьтысь, Сыктыв уездын) пессьӧны-пессьӧны сувтны бур туй вылӧ, кыссьӧны югыдлань, зільӧны тӧдмавны унатор, сӧмын некыдзи оз вермыны. Собранньӧяс вылын унаысь нин шулісны восьтыны лыддьысян керка, керкасӧ лӧсьӧдӧмаӧсь нин и ломтыны кутчысьӧмаӧсь сійӧс.

Кодсюрӧ нигаяс, газетъяс кӧсйысьӧны вайны сэтчӧ, бур сёрнияс нуӧдны, отсасьны, кыпӧдны йӧзӧс бур олӧмлань. Ставыс лӧсьыд, сӧмын... ӧтитор оз тырмы: патераысь да биысь немторйӧн мынтыны — сьӧмным абу.

Изкарса войтыр сьӧм корӧм могӧн шыӧдчыліс асланым волполитпросветӧ (ӧтчыд весиг газет пыр), унаысь сёрнитліс волисполкомса юралыськӧд — Осипов ёрткӧд, да немтор, некодсянь некутшӧм отсӧг. Волисполкомса юралысь веськыда шуӧ: «Исполкомсянь некутшӧм отсӧг сьӧмӧн оз ло тіянлы. Лыддьысян керкаяс вылӧ сетӧм сьӧм — 200 шайт саяс — юклӧма нин куим лыддьысян керка вылӧ».

Пайтӧм Макарӧн кольччыны миянлы зэв забеднӧ. Миян ногӧн кӧ — 200 шайттӧ позис эськӧ нёль пельӧ юкны. Босьтам Тентюковса лыддьысян керкаӧс. Сійӧ школаын. Торъя патернӧй ни, стӧрӧжлы ни дон оз ков мынтыны. Сійӧ школаас эм сцена. Карасиныд вылӧ да посни рӧскод вылӧ позяс спектакъяс сувтӧдлыны.

Сы весьтӧ эськӧ, миян думысь, миянлы сьӧмтӧ колӧ сетны, нажӧвитчыны ми некыдзи огӧ вермӧ. Изкарсаяслы ветлыны Тентюков школаӧдз ылын (2 верст), лунтыр пессьӧм-уджалӧм бӧрын оз мунсьы сэтчӧ. Сідзи со сэсся и оламӧй. Зэв ёна колӧ лыддьысян керкаыд, да абу. Индӧй туйяс сьӧм корсьны лыддьысян керка вылӧ.

А. Коданёв.