СПЕКТАКЪЯС ЙЫЛЫСЬ

Коми йӧз пиӧ бӧръя воясын ёна пырис спектакасьӧм. Спектакасьӧм коми сиктъясын тӧдчӧ ёнджыка лыддьысян керкаса удж дорысь. Спектакъяс вылӧ волывлӧны том войтыр, олӧмаджык йӧз.

Сӧмын коми йӧзлӧн спектакасьӧм вылӧ видзӧдӧм ӧти боксянь. Найӧ спектакъясысь сӧмын корсьӧны гаж, серам, быд пьесалысь велӧданторсӧ оз аддзыны. «Ёна жӧ сералім талун спектак вылын. Кутшӧм тешкодь талун вӧлі спектакыд, кочкавтӧдз сералім», — со мый коми йӧз шуасны. Теш-ӧ, драма-ӧ пуктан — пыр ӧтмоза серам. Спектак вылын петкӧдлӧм йӧзлӧн пель пырыс сӧмын мунас, кочкавтӧдзныс найӧ сераласны, сэсся и нинӧм.

Колӧ вӧчны водзӧ кежлӧ сідзи, медым коми йӧз быд спектак видзӧдӧмысь босьтісны кутшӧмкӧ пӧльза, медым тӧдасны найӧ — быд пьеса велӧдӧ олӧмӧ, висьталӧ, кыдзи колӧ овны, кыдзи оз ков.

Мый колӧ вӧчны та кузя? Ме ог кут тані висьтавны быд спектакъяс кежлӧ ворсысьяслы бура лӧсьӧдчӧм йылысь, сцена йылысь, гримъяс йылысь. Тайӧ, дерт, ёна колантор, медым верман петкӧдлыны йӧзыслы, мый пьесаас кӧсйӧма шуны пьеса гижысьыс. Та кындзи колӧ коми йӧзлы висьтавлыны спектакъяс йылысь, висьтавны — быд пьеса кутшӧмкӧторйӧ велӧдӧ, пьесаын ӧтитор серавсьӧ, мӧдтор ошкыссьӧ.

Гӧгӧрвотӧмджык пьеса сувтӧдӧм водзвылын колӧ висьтавны дженьыдика, мый йылысь пьесаас висьтавсьӧ.

Эн пӧ.