ГӦРД АРМИЯЫН

Юӧр гӧрдармеечлӧн

Сетӧны мывкыдлун

Ме служита Ленинградын. Миян часьтын джын гӧрдармеечыс коми войтыр. Мамъяс миянӧс мӧдӧдігӧн вӧлі шогсьӧны, шуӧны — зэв пӧ лоӧ сьӧкыд служитны. Вӧлӧмакӧ, дзик мӧд ногӧн. Ми Гӧрд Армияын олам да уджалам зэв бура. Велӧдчам тшӧтш. Лун-вой кольӧ зэв ӧдйӧ. Он и тӧдлы — кольӧ кык воыд.

Унаӧн гортысь мунігӧн коми том йӧз оз кужны вӧлі лыддьысьны ни, гижны ни. Найӧс воӧмӧн тшӧтш Гӧрд Армияын босьтчисны велӧдны. Ӧні кужӧны нин лыддьысьны-гижны.

Бать-мам, виччысьӧй миянӧс, коми том йӧзӧс, бур мывкыдлунӧн. Сэтшӧм мывкыдлунсӧ сетӧ миянлы Гӧрд Армия.

Коми йӧз! Тшӧктам тіянлы велӧдчыны, тшӧктам гижны миянлы, кыдзи уджныд мунӧ. Медся ёна тшӧктам корны газетъяс, лыддьыны найӧс.

Гӧрдармееч Н. Лучкин.

Ленинград.